Hanesan mahon ba joventude sira, Conselho Nasionál Juventude Timor-Leste (CNJTL) husu ba juventude sira atu molok envolve an ha Partidu Politiku ida tenke buka hatene uluk partidu ne’e ninia ideolojia.

Ho hanoin ida ne’e, CNJTL realiza debate Juventude Partidu Politiku. Liu husi debate ne’e, juventude husi kada Partidu Politiku hato’o sira-nia koñesimentu kona-ba vizaun no misaun husi partidu ne’ebé sira reprezenta ba.

“Ha’u hanoin juventude partidaria sira mai explora sira-nia koñeseimentu politika iha debate ida ne’e no razaun saida mak tama ba partidu ne’e no tenke komprende didi’ak partidu ida ne’e ninia idelojia mak tama la’os ba tama de’it no la konsiente katak nia tama ba partidu ne’e atu halo saida,” dehan Sekretariu Jeral CNJTL, Luis Ribeiro ba jornalista sira hafoin akompaña debate Juventude Partidu Politiku iha Salaun Delta Nova, Tersa (28/02).

Nia dehan, juventude hanesan potensia lideransa futuru nasaun nian no joventude sira ne’ebe inklina an ba partidu presiza fó kondisaun ba sira atu prepara sira-nia an.

Iha fatin hanesan, Vise Prezidente Juventude Partidu Libertasaun Povu (PLP), Olasco Mendes apresia programa debate ne’ebé CNJTL organiza.

Tuir nia, programa ne’e fó posibilidade ba juventude husi partidu politiku sira atu fó sai sira-nia koñesimentu kona-ba vizaun no misaun partidu ne’ebé sira reprezenta.

“Ha’u hanoin debate ida ne’e di’ak maibé persiza hadia nia meteodolojia balun atu nune’e debate ne’e la’o ho di’ak, labele gasta tempu barak,” katak nia.