Liu husi enkontru Koordenasaun Ministeriál ne’e, Xefe Governu, Mari Alkatiri, husu ba membru governu sira atu hatama lalais programa no orsamentu kada ministériu nian hodi bele haree no diskute hamutuk molok aprezenta ba órgaun lejizlatura.

Ministru Prezidensiál Konsellu Ministru (MPKM), Adriano do Nascimento hateten, enkontru ne’e atu halo koordenasaun ho ministru sira para atu hatene sira nia programa no orsamentu ministériu nian.

Tanba ne’e, ministériu sira hahú haree ona sira nia programa no orsamentu atu bele aprezenta ba Parlamentu Nasionál, tuir dala legál ne'ebé iha hafoin simu pose.

Laiha determinasaun, maibé programa no orsamentu ne’e ezije atu tenke hatama iha tempu badak ba xefe governu hodi tau hamutuk.

Adriano hatutan, maski VII Governu ne’e seidauk kompleta ninia estrutura, maibé governu rasik kontinua esforsa atu iha tempu badak bele kompleta membru Governu na’in 30 para atinji no garante servisu governu nian ba tinan lima.