Kinta, 13 Agostu 2020 | Login
Karreta PN sai Xapa Matrikula Privadu Karreta PN sai Xapa Matrikula Privadu

Prado PN 53 Muda ba Xapa Privadu Featured

DILI: Konsellu Administrasaun Parlamentu Nasionál halo ona identifikasaun ba karreta Prado ne’ebé eis-deputadu III lejizlatura sira uza, no iha karreta Prado PN hamutuk 53 maka muda ona xapa matríkula ba privadu.

“Sekretáriu Jerál Parlamentu Nasionál halo ona karta ba Diresaun Nasionál Transporte Terestre (DNTT) atu halo identifikasaun ba karreta Prado Parlamentu Nasionál nian hira maka xapa matríkula fila ona ba privadu”, dehan Prezidente PN, Arão Noe de Jesus, iha servisu fatin, horisehik.

Tuir nia, servisu entre Konsellu Administrasaun PN ho DNTT ne’e konsege identifika ona karreta Prado 53 mak eis-deputadu sira muda ona nia-xapa matríkula ba privadu.

Karreta hirak ne’e maski xapa matríkula muda ona maibé liu husi servisu hamutuk entre PN ho DNTT iha tempu badak administrativamente sei muda fila ba xapa matríkula PN.

Kuandu xapa matríkula muda hotu ba PN hanesan uluk karreta hirak ne’e eis-deputadu sira tenke mai entrega hikas ona ba PN atu administra hodi fó fali ba deputadu sira atu uza ka oinsá ne’e depois mak haree fali.

Alende ne’e, kona-ba akizisaun karreta foun ba membru deputadu sira seidauk iha informasaun, tanba ne’e sei deside iha konsellu administrasaun.

Iha fatin hanesan, Vise-Prezidente PN, Luis Roberto hatete, karreta Prado patrimóniu Estadu tanba ne’e merese fila-fali ba Estadu. Laiha razaun eis-deputadu sira atu lori nafatin karreta hirak ne’e hodi halo atividade privadu tanba tuir prosesu administrasaun, osan US$ 8.000 ne’ebé uluk uza ba leilaun reembolsa ona.

Karta ami manda ona ba DNTT atu muda xapa matríkula ba fali nia orijinál. Tanba ne’e, kuandu sira la fó fila ita sei uza kompeténsia hodi husu ba Ministériu Públiku atu fó autorizasaun ba PNTL hodi hadau”, dehan nia.

Nia hatutan, ema balun dehan karreta hirak ne’e antes halo ona leilaun tanba ne’e muda xapa matríkula ba privadu no lakohi entrega ona, tanba ne’e karik PN ezije beibeik sira sei lori ba tribunál, maibé sira laiha ona direitu tanba osan fó fila ona.

Read 238 times
Rate this item
(0 votes)