Sexta, 03 Abril 2020 | Login
Ministru Planu e Investimentu Estratejiku, Xanana Gusmao ho Prokurador Jeral Republika Jose Ximenes Ministru Planu e Investimentu Estratejiku, Xanana Gusmao ho Prokurador Jeral Republika Jose Ximenes Foto INDEPENDENTE

PJR La Responde Akuzasaun Xanana Featured

DILI: Prokuradór Jerál Repúblika, José Ximenes la fó resposta ba akuzasaun Ministru Xanana Gusmão nian kona-ba halo gastu ba osan estadu nian la ho resibu.

Jornalista diáriu ne’e halo tentasaun dala rua hodi entrevista Prokuradór Jerál Repúblika, José Ximenes maibé lakohi fó komentáriu.

Tentativa entrevista ba prokuradór halo ba dahuluk bainhira pauza kafé dadeer, maibé nia dehan labele ko’alia tanba kondisaun saúde.

“Ha’u labele ko’alia tanba ha’u moras hela, ha’u nia inus metin no ha’u nia tilun sira diuk hotu, ne’ebé ha’u labele fó komentáriu,” tenik nia, bainhira partisipa Konferénsia Internasionál Kombate Korrupsaun, iha edifísiu Ministériu Negósiu Estranjeiru no Kooperasaun (MNEK), horisehik.

Maibé, depois pauza kafé dadeer, iha sesaun segundu, Prokuradór Jerál Repúblika sai panelista no fó palestra iha Konferénsia Internasionál Anti Korrupsaun, ne’ebé realiza husi Parlamentu Nasionál.

Nune’e, hafoin prokuradór fó palestra, jornalista diáriu ne’e tenta tan dala ida, maibé Prokuradór José Ximenes kontinua lakohi fó komentáriu ba jornalista diáriu ne’e.

Entretantu, iha fatin hanesan, Komisaun Anti Korrupsaun (KAK), Adérito Pinto Tilman, rejeita atu fó komentáriu ba karta aberta husi Ministru Kay Rala Xanana Gusmão ba Emília Pires tanba ne’e nu’udar intervensaun polítika.

“Karta aberta ami nu’udar judisiáriu ami labele ko'alia. Tanba ne’e, intervein husi polítika sira nian,” dehan Komisáriu Adérito.

Karta Aberta Xanana Solidáriu

Karta aberta husi Ministru Planeamentu Investimentu no Estratéjiku (MPIE), Kay Rala Xanana Gusmão ba Emília Pires hanesan asaun solidariedade ba arguida Emília.

Maski nune’e, Diretór Ezekutivu Justice System Monitoring Program (JSMP), Luis de Oliveira Sampaio hateten, solidariedade husi maun boot Xanana reprezenta karta transferénsia polítika ba sistema judisiáriu. Tanba asaun ne’e liu husi karta ho pájina hamutuk sia (9) entrega diretamente ba ajénsia notisiáriu internasionál.

Karta ne’e halo depois arguida Emília haruka karta aberta ida ba Prezidente Repúblika (PR), Taur Matan Ruak hodi kontesta prosedimentu no desizaun Tribunál Distritál Dili (TDD).

Tuir nia, ne’e tentativa polítiku hodi interfere iha sistema judisiáriu no ameasa sériu ba independénsia judisiáriu no prinsípiu separasaun podér ne’ebé konsagra iha konstituisaun.

Karta ne’e hafraku setór judisiáriu no prejudika konfiansa públiku ba ba funsionamentu loloos ho kredibilidade instituisaun. Tanba iha kazu ne’e tau espesiál eis Ministra Finansas hodi dezakredita no minimiza autoridade judisiáriu sira ne’ebé tinan barak ona administra sistema judisiáriu nasaun nian.

“Ami preokupa bainhira karta ne’e sai, ami sente katak ida ne’e kontra prinsípiu ho vontade inisiu ne’ebé Sr. Ministru (Xanana) hatudu iha karta ne’e,” dehan Luis.

Ne’e duni, husu ba Ministru Xanana labele hafraku funsionamentu órgaun judisiáriu, tanba polítika sira halo sala mós Tribunál Distritál Dili (TDD) nunka atu mete.

Kazu sira ne’ebé tama mai iha tribunál halo investigasaun no prosesu julga, ulun boot sira hanesan Xanana Gusmão labele halo deklarasaun públiku bele fó influensia boot no halo juis sira ta'uk atu foti desizaun.

Read 3574 times
Rate this item
(0 votes)
MidAd1