Ne’e duni, Asosiasaun Majistratura Judisiál Timor-Leste (AMJTL) dezafia Ministru Justisa atu buka tuir máfia loloos ne’ebé mosu husi prosesu disputa rai ne’e rasik.

Prezidente AMJTL, Antonino Gonçalves hatete, DNTP tutela ba Ministériu Justisa , ne’e duni, bainhira ministru ida dadus bele halo investigasaun hodi buka tuir loloos máfia ne’e, tanba ministru rasik iha kompeténsia.

“Se identifika envolvimentu ba kazu krime ruma tenke hato’o ba iha Ministériu Públiku hodi lori prosesu ne’e ba oin”, dehan nia, iha knaar fatin, Kaikoli-Dili, horisehik.

Presiza toma desizaun ba prosesu sira hanesan ne’e nune’e labele sai presente iha futuru no mós hadi'a mekanizmu legál ne’ebé iha.

Antes ne’e, Pedro Aparício nu’udar Advogadu hateten, problema disputa rai ne’ebé barak akontese iha rai laran tanba hahalok husi funsionáriu DNTP nian ne’ebé hakarak halo komplikadu prosesu hotu-hotu ho intensaun balun.

“Iha Terras Propriedade ne’e ita lalika ragukan buat ne’e. Ha’u advogadu dezde tinan 2003 to’o agora ne’e. Memang iha duni servisu máfia. Sé mak dehan la iha? tanba funsionáriu Terras Propriedade mak halo. Iha prosesu barak mak sira halo hanesan ne’e”, dehan nia, iha Tribunál Distritál Dili (TDD), foin lalais ne’e.

Nia fó ezemplu, iha rai ida rezolve hela no Terras Propriedade halo mediasaun, rai ne’e nia estatutu konflitu, maibé husi funsionáriu sira Terras Propriedade fó ba ema arenda, entaun ne’e signifika katak servisu máfia no laiha onestidade.

Ne’e duni, tuir nia, deklarasaun Ministru Justisa ne’e loos, kuaze problema rai iha Timor laran tomak ne’e funsionáriu Terras Propriedade mak halo sai komplikadu.

Maski nune’e, nia dehan, la’ós funsionáriu hotu-hotu iha DNTT, maibé iha ema ida-rua maka komete hahalok ne’e, liuliu ne’ebé asume kargu importante sira balun.

Kona-ba kazu Kaitehu, Pedro dehan, uluk funsionáriu DNTP hatete ba kompañia China Harbour katak, rai ne’e Estadu nian entaun ikus mai Sekretáriu Estadu Terras no Propriedade (SETP) no Ministru Justisa (MJ) tuun direta hodi haree. Nune’e, sira identifika katak, rai ne’e fahe ba rua. Rai ne’ebé pertense ba fó leten ne’e Estadu nian, no ida seluk iha rai tetuk ne’e rai privadu.

Nune’e, rai privadu ne’e kompañia China Harbour halo kontratu arendamentu ho komunidade hamutuk xefe família 17, maibé lakohi atu halo arendamentu ho kompañia Marino Enterprise, maski estatutu rai ne’e fahe klaru husi husi SETP no MJ.

Maski estatutu rai ne’e klaru ona, maibé funsionáriu balun iha DNTP hakerek karta ba Gabinete Primeiru Ministru nian katak rai ne’e nafatin pertense ba Estadu nian. Ne’e duni, komplikadu ne’e ne’e hamosu husi funsionáriu DNTP rasik.

Nune’e, Ministru Justisa, Manuel Cárceres mós antes ne’e hateten, sei buka tuir máfia sira no sei book uluk husi DNTP.

“Ha'u sei buka máfia sira halo problema, ha’u brani buka máfia sira book husi Terras no Propriedade, sei duni sai sira hotu. Ha’u la ta'uk ema ida”, tenik nia.

Relasiona ho kazu ne’e jornalista diáriu ne’e halo tentasaun ba Sekretáriu Estadu Terras Propriedade (SETP) maibé lakohi fó komentáriu.