Manu-Teen Lulik Loke ona ‘Portaun’ Palasiu Governu ba Alkatiri Featured

By Tomé Amado Setembru 28, 2017 1126
Lia-nain dada fila hikas juramentu Alkatiri Lia-nain dada fila hikas juramentu Alkatiri

DILI: Lia na'in husi lisan neen iha territóriu Timor tomak, Dili, Lautem, Ermera, Bobonaru, Oekusi no Manufahi hala’o ona serimónia kulturál ‘loke portaun’ hodi Primeiru Ministru, Mari Alkatiri, bele hakat ona ba Palasiu Governu laran.

Rezultadu husi prosesu kultura ne’e hatudu sinál pozitivu. Husi manu aman mutin tolu ne’ebé haree ninia-teen lulik laiha hatudu sanak ruma. Signifika katak, juramentu ne’ebé halo iha tinan 11 liubá dada hotu ona no dalan moos ona.

Lia-na’in Moisés Sama-Leten husi lisan Munisípiu Bobonaru hateten, serimónia ne’e tanba lia naksalak iha tinan 2006. Husi lisan neen haree ona husi manu-teen lulik katak, Maromak fó no rai ida ne’e perdua fali nia hodi loke dalan ba primeiru ministru atu kaer fali governu ne’e.

“Ita hotu tenke fiar metin ba Estadu ida ne’e, tenke hakuak lesuk nia tane nafatin nia para labele monu iha dalan klaran, tenke lori nia ukun to’o tinan lima”, dehan nia, iha Palasiu Governu, horisehik.

Nia dehan, lia-na’in sira hamulak ba rai, tasi no foho lulik no ba Maromak atu ukun na’in sira bele fó laran ba malu. Husi na’in lulik ne’e lia-na’in sira sei ofrese ba matebian sira ne'ebé mate iha 2006 atu simu hodi labele hamosu tan lia naksalak iha rai ne’e.

Entretantu, Primeiru Ministru, Mari Alkatiri, konfesa katak loos duni iha 2006 nia jura duni iha bandeira oin hodi hateke mai palasiu katak nia nunka mais atu tama tan iha ne’e.

Liu ona tinan 11 nasaun bolu fali nia, maibé husu para atu iha serimónia kulturál para bele dada fali ninia juramentu. Ne’e duni, Alkatiri kontente tanba nasaun fó fali fiar atu fila-fali mai palasiu.

Maski nune’e, nia deklara katak, todan liután ba nia iha tempu agora. Tanba tinan 11 nia husik palasiu ne’e fuuk seidauk mutin, agora nia fila-fali mai ho fuuk mutin ho idade 60-resin.  

Rate this item
(0 votes)

Independente Digital TV