Kuarta, 22 Janeiru 2020 | Login
Lere ho Falur Lere ho Falur

Lere ho Falur Deferente Ideia iha Prosesu Rekrutamentu F-FDTL Featured

DILI: Vise Xefe Estadu Maior FALINTIL-Forsa Defeza Timor Leste (F-FDTL), Brigadeiru Jeneral Falur Rate Laek, la aseita ho deklarasaun husi Xefe Estadu Maior F-FDTL, Maijor Jeneral Lere Anan Timur kona-ba see mak merese no la merese sai membru F-FDTL.

Molok ne’e, Maijor Jeneral Lere deklara iha rekrutamentu membru F-FDTL ba tinan 2020 sei fó prioridade ba veteranu nia oan no la fó oportunidade ba Timor-oan ne’ebé nia inan-aman sei hela iha Indonezia.

Ba kestaun ne’e, Brigadeiru Jeneral Falur hatete, rekrutamentu ba forsa foun ne’e la’os prioridade ba veteranu nia oan de’it maibé ba sidadaun Timor Leste tomak.

“Rekrutamentu forsa foun ne’e laiha prioridade ba veteranu nia oan sira, tanba lei ne’e hatete ema sidadaun ida de’it, iha Timor ne’e sidadaun ida de’it, laiha sidadaun ida ne’ebé otonomia ka intergasaun ka Mau-hu ka Bui-hu, ne’e laiha ona, ne’ebé lalika fiar fali lia-fuan sira ne’e no ita lalika kaer lia-fuan (ne’e).

Ema bele ko’alia oin seluk maibé naverdade sistema mak regula,” deklara Falur hafoin enkontru semanál ho Prezidente Repúblika Francisco Guterres Lu Olo, iha Palasiu Prezidensiál Bairu-Pite, Kuarta (23/10).

Tuir Falur, kriteria ne’ebé estadu halo ba sidadaun Timor Leste hotu-hotu ne’ebé iha nasionalizmu no patriotizmu iha liberdade atu kompete sai membru F-FDTL.

“Maibé sira ne’ebé di’ak ba (sai membru F-FDTL), sira ne’ebé la priense kriteiru la ba, se sira ba analfabetu labele ba, se sira moras labele ba, sira la’os sidadaun Timor-oan labele ba,” dehan nia.

Kona-ba deklarasaun Maijor Jeneral Lere katak sira ne’ebé nia inan-aman hela iha Indonezia sei la hetan oportunidade atu sai membru F-FDTL, Falur hili atu la hatan ho razaun nia respeita ninia Komandante.

“Ha’u respeita ha’u-nia Xefe Lere Anan Timur hanesan ha’u nian Komandante ne’ebé deklara dehan katak sei la simu otonomista nia oan iha FFDTL favor ba husu rasik iha nia atu fó resposta tanba ida-idak mak hatan,” dehan nia.

Entretantu, foin lalais ne’e, Xefe Estadu Maior Jeneral F-FDTL, Maijor Jeneral Lere Anan Timur hatete, prosesu rekrutamentu ba membru foun F-FDTL sei halo rigoruzu liu tan.

Iha rekrutamentu ne’e, Lere dehan, sei fó prioridade ba veteranu no ema rejistensia nia oan. Aleinde ne’e, Lere hatutan, F-FDTL mós sei husu tuir paradeiru husi inan-aman husi joven sira ne’ebé hakarak sai membru F-FDTL.

“Tenke hatene kada rekruta ninia inan-aman ne’e moris iha ne’ebé, dala-ruma oan balun, belun balun ninia inan-aman iha Atambua ne’eba sira haruka mai iha ne’e atu kria kondisaun.”

“Tanba atu sai militar ne’e lutu ba nasaun, atu defende soberania nasaun ninian, ne’e mak rekrutamentu ida ne’e tenke rigorozu uitoan, tenke husu tuir (paradeiru inan-aman),” dehan Maijor Jeneral Lere hafoin hasoru-malu ho Prezidente Repúblika Francisco Guterres Lu Olo iha Palasiu Prezidensial, Kuarta (16/10).

Maijor Jeneral ne’e dehan, bainhira hakarak sai Timor-oan, tenke sai Timor-oan ne’ebé loloos katak oan no inan-aman sira tenke hela iha Timor Leste.

“Se inan-aman iha Atambua pasiensia ita labele sai (membru) Forsa Armadas tanba inan-aman iha hela sorin,” dehan nia.

Lere dehan, nia la fó sala ba oan sira husi inan-aman ne’ebé iha tempu uluk lakohi ukun aan, maibé inan-aman tenke hahú eduka nia oan sira hodi bele iha sentidu estadu.

“Ita la fó sala ba oan. Maibé agora depende mós inan-aman tenke eduka ninia oan no oan mós tenke manan sentidu estadu ne’e, sai nasionalizmu, sidadaun di’ak, nasionalista di’ak no patritiotizmu tenke maka’as,” deklara nia.

Read 3872 times
Rate this item
(0 votes)
MidAd1