Primeiru Ministru, Mari Alkatiri, fó fiar ba membru PLP na’in rua hanesan André da Costa Belo ‘L-4’ ba kargu Sekretáriu Estadu Asuntu Veteranu (SEAV) no José Neves ‘Samala Rua’ ba Ministru Edukasaun.

L-4 no Samala Rua envolve iha VII Governu konstitusionál la reprezenta Partidu Libertasaun Populár (PLP), maibé hanesan ema independente.

Deklarasaun ne’e, fó sai husi L4 hafoin hasoru malu ho PM Alkatiri, iha Palasiu Nobre Lahane-Dili, horisehik.

“Ita nia Primeiru Ministru fó ha’u pasta hanesan Sekretáriu Estadu ba Asuntu Veteranu”, dehan nia.

L-4 dehan, nu’udar ema veteranu luta ba libertasaun independénsia prontu, aseita no agradese tebes ba konfiansa ne’ebé Primeiru Ministru fó atu kontinua serbí rai no povu ida ne’e.

Nia hatutan, envolve aan iha governu hanesan ema veteranu ne’ebé iha espíritu nasionalizmu atu serbí povu no rai Timor-Leste. Fó prioridade ba asuntu falsifikasaun dokumentu veteranu hodi simu osan estadu.

Nia informa, PM Alkatiri fó hatene atu prepara aan simu pose iha Semana ne’e nia laran.

Aleinde ne’e, Xefe Governu mós fó fiar ba Cipriano Doutel atu asume kargu importante ida Governu ne’e.