Konfrontu iha Ai-Mutin: Ida Mate, Rua Kanek Featured

By Domingos Gomes Setembru 24, 2019 3609
PNTL hiit hela mate isin husi konfrontu entre grupu iha Aimutin. PNTL hiit hela mate isin husi konfrontu entre grupu iha Aimutin.

DILI : Joven ida mate iha fatin, no vítima na’in rua hetan kanek, hafoin konfrontu entre Grupu Organizasaun Arte Rituál Kolimau 2000 no Grupu juventude sira iha área Aldeia Postu Penál Ai-Mutin, Komoro-Dili, Segunda (23/09), maizumenus tuku 10:30.

Kronolojia kazu ne’e, bainhira Grupu Kolimau 2000 ho ema rihun ho konvoi fila husi serimónia Inaugurasaun Gruta Sagrada Coracão de Jesus iha Ai-Turi Laran Taibesi-Dili, atu fila ba ida-idak nia munisípiu, derrepente too área Ai-Mutin nian grupu estudante no Kolimau 2000 tuda malu tama too área negósiu Ropa Obralan. Nune’e, vitima Ivon da Silva (22) husi Munisípiu Ainaru hetan tuda no sona iha parte hirus matan. Rezulta mós joven ida ho naran Mário Ricardo (Lospalos) hetan kanek iha ulun no mestre ida kanek iha liman.

Hafoin akontesimentu, Polísia Nasionál Timor-Leste (PNTL), liu husi Batallaun Orden Públiku (BOP) no FALINTIL-Forsa Defeza Timor-Leste (F-FDTL) husi Unidade Polísia Militár (PM), to’o iha fatin akontesimentu no tiru gás lakrimojeniu hodi hakalma situasaun.

Durante tuda malu, parte PNTL mós konsege kaptura suspeitu na’in rua ne’ebé deskonfia autór ba kazu konfrontu. Suspeitu sira oras ne’e detein ona iha Polisia Nasionál Sientífika Investigasaun Kriminál (PNSIK).

Xefe Aldeia Postu Penál, Martinho Gomes rasik la hatene autór sira ne’ebé oho mate vítima, tanba kazu ne’e asalta malu halo ema hotu pániku no halai arbiru.

Xefe Aldeia ne’e dehan, vítima ne’ebé mate la’ós pertense ba Ai-Mutin nian, maibé husi bairru seluk.

“Problema nian hun ha’u la hatene tuir, agora sé maka oho vítima mós ha’u lahatene tanba massa mai ne’e barak loos,” dehan nia, iha fatin akontesimentu.

Iha oportunidade ne’e, Xefe Suku Komoro, Eurico de Jesus, hamutuk ho PNSIK halo kedas entrevista ho sasin balun hodi buka hatene motivu husi kazu ne’e, inklui buka tuir suspeitu ne’ebé oho mate vítima.

“Ida mate, no kanek ne’e ha’u la hatene tuir, so investigasaun mak bele hatene kona-ba ida ne’e,” dehan nia Xefe Suku.

Iha Fatin hanesan, sasin Marito Pereira dehan, akontese mosu husi provokasaun entre estudante sira ho Grupu Kolimau 2000, ikus mai tuda malu husi estrada laran tama too área Kapela Ai-Mutin nian hodi mosu kazu sosa joven ida.

Entretantu, parte Polisia rasik sei rekolla informasaun inklui buka tuir dadus husi parte CCTV ne’ebé negosiante mota iha loja besik fatin akontesimentu.

Komandante Unidade Espesiál Polísia (UEP), Superintendente Xefe, Afonso dos Santos koordena ho Polisia Militár hodi asegura situasaun iha fatin akontesimentu hodi evita mosu problema foun.

Mate isin Ivon da Silva lori ona ba iha mortuariu Ospitál Nasionál Guido Valadares (HNGV) hodi halo prosesu autópsia,

Husu Polisia Investiga Kazu Ne’e

Entretantu iha parte seluk, Koordenadór Jerál Másimu Grupu Kolimau 2000, Júlio Sarmento Meta Malik lamenta konfrontu ne’ebé akontese hodi hamate nia membru ida.

Nia mós lamenta ho vijilánsia PNTL ne’ebé la konsege atua situasaun, liu-liu atu fó seguransa ba grupu sira ne’e fila ba idak-idak nia munisípiu.

“Ami lamenta akontesimentu ne’e ami nia karta ba Komandu Jerál PNTL atu halo saida, tanba polisia loloos halo patruliamentu akompaña sira fila,” nia lamenta.

Eis Sekretáriu Estadu Veteranu ne’e dehan, tuir loloos problema ne’e labele mosu, tanba sira halo ona karta ba PNTL hodi akompaña masa mai Dili no husi Dili fila fali ba idak-idak nia fatin.

Nia husu parte PNTL atu halo investigasaun kle'an hodi kaptura suspeitu ne’ebé oho vítima.

Entretantu, Komandante PNTL Munisípiu Dili, Superintendente Xefe Armando Monteiro, rekoñese grupu Kolimau 2000 sira husi munisípiu 13 mai iha Dili hodi partisipa misa no halo inaugura Gruta Ai-Turi Laran-Taibesi.

Armando mós rekoñese prezensa grupu sira ne’e mai hetan koñesimentu husi parte PNTL hodi asegura seguransa iha selebrasaun misa iha loron domingu liubá prezide husi Bispu Dioseze Dili, Don Virgílio da Silva do Carmo SDB.

Rate this item
(0 votes)

Independente Digital TV