Komunidade iha Beasu Prontu Ofrese Rai Konstrui Planta LNG Featured

By Janio da Costa Jullu 17, 2019 4950
Plantasaun LNG Plantasaun LNG

DILI: Komunidade iha Beasu, Vikeke deklara prontu ofrese rai ba Governu hodi konstrui Planta Liquid Natural Gas (LNG), maibé husu atu harii bairu foun ba sira.

Xefe Suku Maluru, Beasu, Francisco Amaral deklara iha deskusaun ne’ebé hala’o husi ekipa ministeriál, kompostu husi Ministériu Agirkultura no Peskas, Ministériu Obras Publika, Sekretaria Estadu Terras Propriedade, Sekretaria Estadu Arte no Kultura, Ministériu Interior, no ekipa Taskforce husi Veteranus hala’o ona sosializasaun no lansamentu programa identifikasaun rai no propriedade ba projétu plantasaun LNG , iha komunidade Beasu, tersa (16/7).

Iha sosializasaun no lansamentu programa identifikasaun rai no propriedade ne’e, Xefe Suku ne’e informa komunidade tomak iha parte Beasu nian prontu apoiu polítika governu hodi harii planta LNG iha Beasu.

Totál Populasaun hamutuk 2.146 no uma kain 546 husi Aldeia lima hanesan Maluru, Makaloso, Loho Oan, Makaliku no Kailoibere ne’ebé hela iha área Beasu nian prontu muda sai iha rai ne’ebé Governu identifika atu harii planta LNG.

Nia husu atu governu halo komprensaun inklui haree bairru foin hodi harii uma ba povu sira ne’ebé afeitadu husi projetu LNG.

Autoridade lokál ne’e mós husu ba governu bainhira harii projetu ne’e atu envolve komunidade sira tenki partisipa iha servisu hodi hetan osan hadi'a sira nia vida moris.

Hafoin lansamentu ne'e, ekipa interministériál sei hahú halo identifikasaun ba rai no plantasaun ne'ebé afetadu ba projetu Timor-Leste LNG iha Beasu, Vikeke.

Timor GAP ho Empreza Xines, China Civil Engineering Construction Corporation (CCECC) asina ona akordu, no Governu Timor-Leste buka hela maneira atu foti osan imprestimu husi rai li’ur hodi investe ba Portu Beasu ba dezembarke materiál tantu gazodutu, ne’ebé sei lori gás naturál husi Kampu Petrolíferu Greater Sunrise, nu’udar unidade husi LNG.

Rate this item
(0 votes)

Independente Digital TV