Kinta, 13 Agostu 2020 | Login
Polisia UPF Polisia UPF

Komandu PNTL Apela Ba Povu Lalika Fiar Boatu Terrorizmu Featured

DILI: Komandante Jerál Polísia Nasionál Timor Leste (PNTL), Komisáriu Júlio da Costa Hornay, husu ba povu tomak atu lalika ba fiar informasaun boatu kona-ba terrorizmu ne'ebé lansa husi média sosiál.

Nia dehan, informasaun hirak ne’ebé fó sai iha média sosiál ne’e falsu. Polísia konsege identifika sira ne’ebé soe hela informasaun ne’e, maibé sira hetan informasaun ne’e tutan fali hodi fahe tutan ba fali ba ema seluk.

Labele konsidera informasaun ne’e loos. Tanba ne’e, keta ba fiar informasaun ne’ebé fó sai iha média sosiál,” dehan Komisáriu Júlio, iha Palasiu Prezidensiál Bairru-Pité, horisehik.

Nia hatutan, PNTL konsege rejistu ona iha Ministériu Públiku (MP) hodi bele lori prosesu ne’e ba oin, hodi bele hapara hanoin ne’ebé fó sai iha média sosiál tuir sira-nia hakarak.

Hanesan mós kazu ida iha Tasi-Tolu, informasaun terrorista ne’e la loos.

Alende ne’e, bainhira timoroan sira haree maluk ne’ebé utiliza atributu izlámiku nian dehan sira ne’e ema terrorista, tuir loloos ne’e labele maibé tenke fó respeitu sira.

Tan ne’e, timoroan kontinua hametin nafatin unidade iha estabilidade nia laran maski iha diferensa relijiaun.

Bainhira haree ho matan no deskonfia duni ema modelu hanesan terrorista duni bele kontaktu ba postu polisia ne’ebé hela besik, nune’e PNTL bele halo atuasaun imediatu ba ema ne’e.

Nune’e, Komandante Jerál PNTL, akompaña mós husi Segundu Komandante Jerál, Komisáriu Faustino da Costa, informa situasaun jerál iha territóriu Timor laran tomak ba Prezidente Repúblika (PR), Francisco Guterres ‘Lú Olo’.

Tan ne’e, maka hakarak informa ba públiku situasaun kontinua la’o hakmatek no laiha problema ne’ebé boot tebes akontese iha Timor laran.

Iha duni problema balun, maibé ho grau ki’ik ne’ebé la fó ameasa ba estabilidade nasionál.

Read 401 times
Rate this item
(0 votes)