Segunda, 14 Outubru 2019 | Login
Hafoin Konversa ho Xanana Horta Deside La Kandidata Aan

Hafoin Konversa ho Xanana Horta Deside La Kandidata Aan

DILI:Hafoin halo reflesaun iha fulan hirak nia laran, Senior Diplomatiku José Ramos Horta deside la kandidata-aan ba Prezidente Repúblika periodu 2017-2022.

Desizaun ne’e nia foti hafoin halo deskusaun no konversa ho líder Timor-oan sira balun, hanesan Prezidente Repúblika, Taur Matan Ruak, Ministru Planeamentu no Investimentu Estratéjiku, Xanana Gusmão, porta-vóz ezekutivu, Agio Pereira, no sekretáriu-jerál Fretilin, Mari Alkatiri no seluk tan.

“Ha’u sei la kandidata-án ba Prezidente da Repúblika 2017-2022,”Eis Presizdente Repúblika hato’o kestaun ne’e ba jornalista sira iha nia rezidensia, Bidau Metiaut, Postu Administrativu Cristo Rei, Díli, Kinta (26/01/2017).

Horta konfesa halo deskusaun mós ho eis Prezidente Repúblika, Kay Rala Xanana Gusmão ba nia prosesu kandidatura. Maibé Premiadu Nobel da Paz ne’e la esplika klaru rejultadu husi deskusaun ne’e.

Maibé molok Horta deside, iha loron rua liu ba (23/1) lider istoriku Xanana Gusmão ne’e deklara uluk ona nia apoiu ba Prezidente Partido FRETILIN, Fransisco Guterres (Lu-Olo) ba Prezidente Repúblika periodu 2017-2022.  

Pozisaun Xanana la apoia Horta ne’e ba-dala rua ona. Iha eleisaun presidensiál  periodu 2012-2017, lider resistensia Xanana fó nia apoiu ba Taur Matan Ruak ba Prezidente Repúblika.

Maski kontinua la hetan apoiu husi Xanana, Horta kompromete atu nafatin iha Timor-Leste hodi fó apoiu ba Prezidente foun sé de’it maka povu hili iha eleisaun tuir mai.

“Ha’u sei iha ne’e, sei partisipa eleisaun ne’e, haree nu’udár observadór hodi ko’alia ho líder hotu-hotu,”Horta  esplika.

Ramos Horta dehan iha fulan-Jullu mai nia fila ba Governu ka lae, ne’e depende ba partidu ne’ebé manan. Horta prontu nafatin servi estadu ida ne’e hodi serbisu hamutuk ho parte hotu-hotu hodi prepara jerasaun foun sira molok entrega rai ne’e ba foin sa’e sira atu kaer. 

Read 1844 times Last modified on Sexta, 27 Janeiru 2017 11:35
Rate this item
(1 Vote)