Sábadu, 07 Dezembru 2019 | Login
Ayam Potong Ayam Potong

Haan Ayam Potong, Feto 5 Tama Ospital Featured

DILI: Feto na’in lima iha area Vera Kruz, Dili, tenke hala’o tratamentu saúde iha sentru saúde Vera Kruz, Kaikoli, hafoin konsumu ayam potong ne’ebé loza ida fa’an ho folin baratu.

Feto na’in lima, Sidonia Fatima da Silva, Sabina Mafada Ximenes, Cristina Oqui, Lucia Maria, Olandina Gusmao de Sousa, hahú sente oin halai, isin todan, ulun moras no muta hafoin haan ayam potong ne’ebé sira sosa iha loza ida ne’ebé lokaliza iha area Estadiu Munisipal Dili nia oin.

Vitima ida, Cristina Oqui hatete, iha Sabadu (12/10) dader, nia ba kompra sasan.

Bainhira to’o iha loja iha Estadiu Munisipal nia oin, nia haree loza ne’e fa’an ayam potong ho folin ne’ebé baratu.

“Naan ne’e baibain fa’an ho folin dollar $3, ida grau 1.800 ne’e, maibé iha dader ne’e sira fa’an ho folin dollar $1,” informa vitima ne’e iha sentru saúde Vera Kruz, Sabadu kalan.

Cristina la konsege haree prazu husi naan manu ne’ebé fa’an baratu ne’e no nia mós sosa hodi lori ba uma.

Cristina mós la deskonfia tanba nia baibain sosa ona naan manu iha fatin ne’e no laiha buat ida.

Maibé, bainhira sona no haan nia hahú sente nia kondisaun saúde la di’ak.

“Ami sona foin haan uitoan de’it komesa oin halai, isin todan, ulun moras, muta,” dehan vitima ne’e.

Iha fatin hanesan, mediku Ricardino Pereira hatete, pasiente na’in lima nia kondisaun ladun grave, no na’in ida mak fila ona ba uma.

“Sira na’in haat ne’e nia kondisaun di’ak, ohin ami tau ona soru ne’ebé oras rua hotu sira fila ona ba uma,” dehan nia.

Iha fatin ketak, bainhira jornalista INDEPENDENTE koko atu konfirma asuntu ne’e ba loza-nain, maibé loza-nain la kohi fó komentariu ho razaun hakarak tuir prosesu husi autoridade kompetente.

Entretantu, Diretór Operasional AIFAESA Gabriel da Costa informa, nia parte serbisu hamutuk ho PNTL Munisipiu Dili halo ona intervensaun ba loza ne’ebé faan naan manu liu prazu ne’ebé rezulta komunidade balun sai vitima.

“Parte loja Luky Market komete duni iregularidade, infrasaun no daudaun ne’e ne’e Aifaesa halo hela selajen ba sira-nia sasan,” deklara Gabriel iha nia knar fatin, Kaikoli, Segunda (14/10).

Read 2339 times
Rate this item
(0 votes)