Sexta, 13 Dezembru 2019 | Login
Vitima Inséndiu iha Ermera-Likisá Vitima Inséndiu iha Ermera-Likisá

Governu Halo Uma Emerjénsia ba Vitíma Inséndiu iha Ermera-Likisá Featured

DILI: Rezultadu inséndiu iha Munisípiu Likisá no Ermera ahi-han uma hamutuk 200 no plantasaun komunidade nian kuaze ektare 16.000. Nune’e, kalkula hamosu prejuizu tokon US$ 10 (sanulu) husi akontesimentu ne’e.

Maioria plantasaun ne’ebé ahi-han iha munisípiu rua ne’e maka produtu kafé, inklui ai-han sira seluk ne’ebé kuda iha toos laran.

Sekretáriu Estadu Ambiente, Deometrio Amaral hateten, ahi han hahú husi Suku Faulara no Asumanu, nune’e tanba anin boot lori sa'e da'et ba mota sorin Suku Leotala, Ura-hou, Licapat no Mau-ubu.

Informasaun ne’ebé diáriu ne’e asesu, uma hamutuk 369 mak hetan estragu husi ahi-han no anin sobu. Dezastre ne’e hakanek ema na’in ida (1) iha Munisípiu Ermera no na’in rua (2) iha Munisípiu Likisá.

Uma Emerjénsia Ba Vítima

Entretantu, Xefe Governu, Taur Matan Ruak, bolu ministériu relevante sira atu buka solusaun ba uma hirak ne'ebé hetan afetadu no inséndiu iha munisípiu haat atu halo intervensaun tanba besik ona tama tempu udan.

“Primeiru Ministru bolu atu tuur hamutuk fila ho ministériu relevante sira atu Governu foti asaun ba uma hirak ne'ebé anin sobu no ahi-han tanba tempu udan besik ona”, tenik dehan Ministru Administrasaun Estatál (MAE), Abílio Caetano, iha Palásiu Governu, horisehik.

Governu hetan ona dadus kredivel atu mai aprezenta hodi halo intervensaun. Nune’e, sei hanoin mekanizmu ne’ebé utiliza hodi harii hikas komunidade sira ninia uma.

Entretantu dadus kompletu ona hein atu halo aprezentasaun ba Konsellu Ministru hodi bele hetan aprovasaun, nune’e bele hahú ezekuta ona harii uma emerjénsia ba komunidade afetadu sira.

Entretantu, hafoin akontesimentu Governu liuhusi Sekretáriu Estadu Protesaun Sivíl (SEPS) fó ona apoiu materiál konstrusaun ba komunidade sira, maibé maioria husi vítima sira ne’e seidauk hetan.

Halibur Apoiu Ba Vítima

Iha parte seluk, atu responde ba nesesidade urjente vítima inséndiu, Movimentu Estudante Munisípiu Ermera halo asaun solidariedade iha Dili laran hodi apoiu vítima sira.

Portavós movimentu, Américo Maia hateten, asaun ne’e halo ho inisiativa husi estudante movimentu Ermera-oan sira ne'ebé daudaun ne'e hela iha Dili.

“Ami husi estudante Ermera tun terrenu hodi halo mini-peskiza ne’ebé kuaze uma 274 iha Munisípiu Ermera postu Hatulia maka hetan estragu”, dehan nia.

Husi doasaun ne’ebé rekolla sei sosa nesesidade bázika sira hanesan foos, mina, lona, inklui nesesidade primáriu sira seluk hodi ajuda vítima sira.

Read 521 times
Rate this item
(0 votes)