Kinta, 19 Setembru 2019 | Login
Mate Isin Saudozu Lucas Da Costa "Lehe Mau/Rama Metan" To'o iha Jardin Heroi ba Pátria Metinaru, Simu Husi Pelotaun ida husi F-FDTL ho Estandarte Bandeira RDTL no FALINTIL hodi Halót iha Fatin Deskansa Eterna, Metinaru (09/09). FOTO: INDEPENDENTE/Jónio Da Costa Mate Isin Saudozu Lucas Da Costa "Lehe Mau/Rama Metan" To'o iha Jardin Heroi ba Pátria Metinaru, Simu Husi Pelotaun ida husi F-FDTL ho Estandarte Bandeira RDTL no FALINTIL hodi Halót iha Fatin Deskansa Eterna, Metinaru (09/09). FOTO: INDEPENDENTE/Jónio Da Costa

Deskansa ho Hakmatek Mestri Rama Metan Featured

DILI: Viajen Lucas da Costa “Rama Metan” iha mundu remata ona. Maske nune’e, nia memoria lubuk sei rai metin iha Timor-oan sira-nia fuan.

Kontribuisaun ne’ebé nia fó sei la mihis ho mudansa tempu. Iha Segunda (09/09), organizasaun no instituisaun estadu presta omenajen ikus ba Rama Metan molok ba haloot iha Jardin Eroi Metinaro.

Hafoin misa iha Igreja Nossa Senhora Auxiliadora Komoro, Saudozu Rama Metan ninia mate-isin lori ba Komite Sentral FRETILIN (CCF) hodi presta omenajen.

Husi CCF kontinua ba Universidade da Paz (UNPAZ), hafoin lori ba Sede PD, kontinua ba sede RENETIL, no ikus mai lori ba Parlamentu Nasional (PN).

Iha PN, Prezidente PN no Bankada Parlamentar sira hato’o sentidu kondolensia ba Saudozu Rama Metan. Saudozu Rama Metan sai membru Parlamentu Nasionál husi Partidu Demokratiku iha lejislatura daruak.

“Ha’u lori Parlamentu Nasionál nia naran hato’o sendu kondolensia ba familia matebian Saudozu Lucas da Costa Rama Metan,” deklara Prezidente PN Arão Noe.

Deputada Bankada FRETILIN Josefa Alvares Pereira Soares lori Bankada FRETILIN nia naran hato’o sentidu kondolesia ba familia matebian Lucas da Costa Rama Metan, familia boot RENETIL no familia boot husi UNPAZ.

“Ho laran susar ita hotu mai hato’o omenajen ikus ba ita-nia maluk Timor-oan ida ne’e. Ha’u lori bankada FRETILIN nia naran hato’o omenajen ikus ba Saudozu,” dehan Josefa.

Hafoin omenajen ikus iha PN, Saudozu lori ba nia fatin deskansa ikus iha Jardin Eroi Metinaro.

Iha Kinta (05/09) tuku 8.00 dader, Reitór Universidade da Paz (UNPAZ) Lucas da Costa “Rama Metan” fila hikas ba Aman Maromak nia Kadunan hafoin hala’o tratamentu saúde iha Hospital Nasionál Guido Valadares (HNGV).

Rama Metan koñesidu nu’udar figura ida ne’ebé durante ne’e fó kontribuisaun ba dezenvolvimentu rai ida ne’e, hala’o tratamentu saúde iha HNGV tanba sofre moras kankru.

Reprezetante Familia ne’ebé mós nu’udar Vise Reitór I UNPAZ, Apolinário Marçal Maia do Rego, informa Rama Metan sofre moras iha kabun no konsege hala’o operasaun dala rua iha HNGV.

Molok ne’e Prezidente Repúblika, Francisco Guterres Lú Olo, hasai ona Dekretu Prezidensiál hodi haloot mate isin Lucas da Costa ‘Rama Metan’, iha Jardín Herois da Pátria, Metinaru.

Prezidente Repúblika dekreta Lucas da Costa hakoi iha Metinaru tanba durante prosesu luta ba libertasaun, saudozu mós sai kolaboradór no fó kontribuisaun barak ba ukun rasik-aan.

Bainhira hato’o sentidu kondolénsias ba Rama Metan iha ninia rezidénsia hateten, saudozu envolve iha luta libertasaun nasionál husi inísiu no asume kargu prinsipál iha períodu baze-de-apoiu ninian. Iha prosesu ne’e, influénsia tebes atu kontinua kontribui atu hasoru okupasaun Indonézia iha vila-laran.

Nune’e, Lucas da Costa iha kampu inimigu ninian harii RENETIL hamutuk ho fundadór sira seluk buka forma hodi luta hasoru rejime Soeharto. Iha períodu ukun rasik-aan, saudozu mai ho vizaun ne’ebé haree dook hodi harii Universidade de Dili (UNDIL) no kontinua harii mós Universidade da Paz (UNPAZ) atu forma ema Timor hodi kontribui ba dezenvolvimentu nasaun ninian.

Iha fatin hanesan, família Matebian, Raimundo Gonçalves, agradese ba Xefe Estadu ne’ebé hakat mai iha rezidénsia matebian hodi fó omenajen ba saudozu ninia kontribuisaun luta ba libertasaun nasionál.

“Prezensa ne’e hanesan rekoñesimentu ba saida maka matebian halo ona ba rai doben Timor-Leste nia ukun rasik-aan,” dehan nia.

Memória sei La Mate

Prezidente Repúblika, Francisco Guterres Lú Olo, bainhira presta omenajen ikus ba saudozu Rama Metan hateten, nia-isin lolon bele mate maibé nia memória sei la mate.

“Ohin loron, nia (Lucas da Costa) la hamutuk ho ita maibé liu-husi kontribuisaun, dalan naruk ne’ebé nia la’o mai to’o ohin loron, ha’u bele hatete katak, ema nia isin-lolon bele mate, maibé nia memória sei la mate,” dehan nia.

Xefe Estadu hato’o profunda kondolénsias ba família sira hotu, maun-alin sira hotu, ba universidade ne’e tomak, partikularmente ba RENETIL ne’ebé mak nia harii.

Nia hatutan, Lucas da Costa, husik hela nia kontribuisaun boot tebes ba rai, no povu, durante tinan tolu nia laran iha baze-de-apoiu gerrilla kontra okupasaun militár Indonézia nian.

Iha tempu difisil tebes, bainhira iha 1978 baze-de-apoiu rahun, nia tama ba faze foun ida ba luta libertasaun nasionál ninian.

Situasaun ida difisil tebes maibé Lucas ho nia matenek hatene sukat nafatin atu oinsá iha situasaun difisil ne’e atu bele lori nafatin ninia ideia, ninia hanoin kona-ba libertasaun pátria ninian, atu bele hala’o nafatin.

Nune’e, ikus fila-fali konsege harii fila-fali RENETIL, organizasaun ne’ebé nia sai rasik fundadór hamutuk ho sira hirak seluk, hodi kontinua nafatin luta ba libertasaun nasionál iha kampu ka zona inimigu ninian.

Ikus liu, kuandu funu ne’e hotu, nia iha vizaun ida dook tebes, harii tan Universidade da Paz (UNPAZ), atu bele partilla ninia koñesimentu sientífiku ba nia oan sira, ba estudante sira, atu bele hateke ba dook, atu bele haree ba Timor-Leste la’ós ohin de’it, atu hatene mós koñese Timor-Leste ba oin atu halo saida tan.

Read 297 times
Rate this item
(0 votes)
MidAd1