Segunda, 09 Dezembru 2019 | Login
MNEK Babo MNEK Babo

Babo Rejeita Hili Família Featured

DILI: Ministru Negósiu Estranjeiru no Kooperasaun (MNEK), Dionísio Babo Soares, rejeita hili família sai Sekretáriu Jerál TL ba ASEAN.

“Sekjer ASEAN nian iha Jakarta ne’e, ema Brunei ida husu para depois halo treinamentu ba ita nia diplomata sira,”dehan nia.

Nia dehan, sira husu atu tenke indika ema ida ba tau iha embaixada hanesan ofisial ASEAN husi Timor, ne’ebé hatene lian inglés. Ne’e duni, indika ona ema hodi hodi reprezenta Timor-Leste iha Jakarta.

“Ha’u laiha relasaun família, nem primu, nem ha’u-nia primu nia feen nia família mós laiha. Ema ne’e diplomata, servisu ona iha MNEK durante tinan haat,” dehan nia.

Nune’e, ema ne’e hetan rekomendasaun husi Diretór Jerál ASEAN iha MNEK no mós rekursu umanu MNEK. Bazeia ba nee maka ministru foti desizaun hodi nomeia ema ne’e.  

Antes ne’e, Bankada Partidu FRETILIN deskonfia Ministru Negósiu Estranjeiru no Kooperasaun (MNEK), Dionísio Babo Soares, hili ninia família sai Sekretáriu Jerál TL ba ASEAN maski la prienxe rekizitu.

Deputada Ilda Maria da Conceição hateten, tuir informasaun ne’ebé iha, servisu iha MNEK buat barak la’o la regra loloos.

MNEK durante ne’e iha lei karreira diplomátiku ne’ebé promulga ona husi eis-Prezidente Repúblika (PR), Taur Matan Ruak, ne'ebá ko’alia funsionáriu MNEK ida atu sai diretór ka sai sekretáriu jerál iha rai li'ur, mínimu liu sira servisu iha fatin destakadu tinan lima, maibé ida ne’e la akontese ba karreira diplomátiku foun ne’ebé Ministru Dionísio hili.

“Ha’u bele dehan katak Ministru Dionísio Babo foti desizaun haruka ninia família ne’ebé foin servisu tinan rua de’it ba sai Sekretáriu Jerál (ASEAN) iha Jakarta. Ne’e la tuir lei ne’ebé iha. Ne’e ha’u bele dehan katak, familiarizmu no nepotizmu,” dehan nia, liuhusi plenária, iha PN, horisehik.

Diplomata timoroan sira ne’ebé durante ne’e iha ona esperiénsia servisu balun tinan 10 to’o 15, maibé hasai hotu ba tau fali ema sira ne’ebé foin aprende ba reprezenta Estadu iha rai li'ur. Hetok liután, diplomata balun la hatene lian Inglés.

Read 745 times
Rate this item
(0 votes)