Kuarta, 21 Agostu 2019 | Login
Anjing Rottweiler (Foto: Pixabay) Anjing Rottweiler (Foto: Pixabay)

Asu Tata Mate Labarik Feto Tinan 2 iha Hera Featured

DILI: Kazu ida ne’ebé la baibain akontese. Iha Kuarta (17/07) dader, labarik feto ida ho idade tinan rua (2) fulan haat (40 lakon nia vida tanba asu ne’ebé nia inan-boot hakiak tata nia to’o mate.

Tuir sasin, iha iha Kuarta dader, labarik feto ho naran Marcia Soares nu’udar oan dahuluk husi Evaristo da Conceicão no Ermelinda Amaral, ba halimar iha nia inan-boot nia uma ne’ebé nu’udar mós sira-nia viziñu.

Marcia nia inan hein hela nia oan daruak ne’ebé sei bebé, no Marcia nia aman ne’ebé nu’udar membru iha grupu agrikultór Hali-Dolar, Hera, hala’o hela nia serbisu rega modo ne’ebé grupu ne’e kuda.

Marcia nia inan-boot husik labarik ne’e halimar iha uma laran no nia sai ba li’ur hodi halo atividade balun. Hafoin oras balun, Marcia nia inan-boot ne’e rona asu nia lian hanesan tata malu.

Ho lalais, nia halai tama ba uma laran no nia haree asu oan-nurak ne’ebé nia hakiak halai sai husi kama okos. Bainhira nia hateke ba kama okos, nia klamar semo tanba Marcia latan hela ho raan falun nia isin-lolon tomak.

Hafoin kazu ne’e, ambulansia tula lalais Marcia mai iha Ospital Nasionál Guido Valadares atu bele hetan salva, maibé doutór sira ne’ebé simu hiit liman, tanba Marcia nia iis laiha ona.

Xefe Interinu Unidade Emerjensia, ONGV, Martisn da Luz Sarmento dehan, tuir informasaun husi mediku sira iha sala emerjensia katak bainhira labarik feto ne’e ho kondisaun mate ona.

“Kanek grave husi asu nia tata fatin sira iha kakorok, tilun, oin lulik no isin lolon tomak iha hotu,” informa Xefe Interinu ne’e.

Mediku sira iha sala emerjensia hakfodak no triste ho akontesimentu ne’e, tanba ida ne’e nu’udar esperensia dahuluk durante serbisu iha sala emerjensia.

Ho akontesementu ne’e mediku sira husu ba inan-aman sira ne’ebé iha oan ho idade kiik, atu tenke tau-matan masimu.

“Karik ita hakiak animal tenke tau-matan másimu tamba tentasaun mai derepente ita la hatene ikus mai bele akontense hanesan kazu ida ohin ne’e,” dehan mediku ida.

Read 510 times
Rate this item
(0 votes)
MidAd1