Kuarta, 23 Setembru 2020 | Login
Angela Freitas. Angela Freitas.

Angela: Massa ‘Hatuun’ PR Sei Konsentra iha Fatin 3

DILI: Sosializasaun ba komunidade sira iha suku Mota-Ulun ne’ebé partisipa husi ema na’in 46, inklui autoridade lokal sira, Angela informa kona-ba programa RNDJ-KRDTL ba asaun pasifiku hasoru PR Lú Olo.

Portavoz RNDJ-KRDTL, Angela Freitas hatete, sosializasaun ne’ebé sira halo atu informa ba komunidade sira atu hatene loloos loron hatama petisaun ba PR Lú Olo iha Palasiu Prezidensial, Bairro-pite, Dili.

Nia esplika, iha 28 Agostu apoiante RNDJ-KRDTL sei konsentra iha fatin tolu: Tasi Tolu, Bekusi, no Sede Nasionál RNDJ-KRDTL, hafoin halo marsa ba palasiu prezidensia hodi intrega petisaun ba PR Lú Olo.

“Ida ne’e massa popular, tanba ne’e duni mak sei aprezenta lista ne’ebé ami rekoila tiha ona hodi hatama ba PR iha loron 28, hafoin ami sei fó mós ultimatu ba PR semana ida, katak to’o 4 Setembru mak sei laiha resposta ne’e mak massa sei tuun husi munisípiu 12 no RAEOA,” dehan Angela.

Nia dehan, tempu to’o ona atu hotu-hotu hamriik hodi defende direitu hanesan sidadaun Timor-Leste, tanba durante tinan barak nia laran buat balun la’o no buat barak mós la’o naksalak, tan ne’e presiza forsa konjunta hodi hadia.

“Forsa ne’ebé ha’u mensiona mak asaun pasifiku. Agora, tama ona iha asaun ida ne’ebé rekolla asinatura atinze ona purvolta 61 mill itál, maibé sei aumenta tan iha semana ida nia laran,” dehan nia.

Maske nune’e, nia hatete, importante ba ema hotu mak presiza mudansa no labele hein tan, tanba ukun-nain sira viola ona direitu, hanesan asaltu poder ne’ebé akontese iha PN.

“Asaltu poder ne’e akontese iha momentu ne’ebé PR Francisco Guterres Lú Ólo rasik dekreta hela estadu emerjensia. Konstituisaun baze legal ne’ebé defende direitu sidadaun nian politikamente, sosiál, ekonomia, no mós kultural nian. Se kontituisaun rasik na’i-ulun sira viola, oinsa mak sira ka’er ukun? entaun buat ruma la loos ona, sira mai utiliza abuzu poder hodi ukun tuir sira-nia gostu, nasaun demokratioka Timor-Leste tenke ukun tuir konstituisaun RDTL,” deklara Angela.

Read 1848 times
Rate this item
(0 votes)