Iha jardín Largu Lesidere ne’e, Kristu Rei, Igreja Motaél oin, Pantai Kelapa, fatin públiku sira seluk governu bandu ona ema labele halo negósiu iha ne’ebá.

Tuir negosiante nuu, Domingos Belo dehan, área mezmu governu balun fa’an nuu iha ne’ebé, maibé sira kontinua fa’an, tanba fatin ne’ebé sira hetan osan lalais liu.

Nia dehan, sira hahú fa’an nu’u iha oras meiudia tuku 12:00 Otl too lokraik 17:00 otl.

“Ami bainhira mai fa’an fila fali iha ne’e ami, tenke hafuhu ekipa patroilha laiha mak ami mai, tanba ne’e sira deskansa maka oras tuku 12 no tuku 5,   tanba ami fa’an iha oras ne’ebé la'ós oras han ka oras deskansa entaun sira haree hetan ne’e sira foti kedas,” dehan Domingos ba INDEPENDENTE iha Largu foin lalais ne’e.

Nia dehan, ekipa operasaun no polisia prende ona ninia kolega balun ninia karrosa no nuu la fó fila too agora.

Domingos dehan, iha Largu Lesidere sira fa’an nuu dala ruma bele hetan osan too $30 too $100, tanba vizitante barak maka vizita ba fatin ne’ebá.

Ne’e duni, hanesan negosiante ki'ik, sira sente triste bainhira governu banku sira labele fa’an nuu iha fatin ne’ebá.

“Ami triste bainhira haruka ami muda obrigamente ba iha kotuk tanba ami ba iha ne’ebá ne’e ema ladu sosa so ema ne’ebé hatene de’it maka ba sosa tanba ne’e ami tenke lori fali mai iha ne’e mais ami hanesan na'ok teen hafuhu ekipa patroilha sira laiha mak ami mai fa'an,” tenik nia ho triste,

Tuir Observasaun jornalista INDEPEDENTE nota iha Largu Lesidere besik Dioseze Dili nia oin negosiante lubuk ida ho karrosa fa'an dook hosi estrada.