Portavoz Komando Polisia Nasionál Timor-Leste (PNTL), Superintendente Polisia João Belo dos Reis hatete, númeru kazu tara an ne’e hamosu preokupasaun.

“Husi fulan Outubru 2025 to'o ohin loron ita rejista kazu tara an hamutuk 13. Ida ne'e la'ós númeru de'it maibé ne'e mak vida ne'ebé lakon, família ne'ebé triste no futuru ne'ebé nakukun,” dehan Portavoz ne’e iha edifisiu MI, Vila Verde, Kuarta (05/02).

Ba situasaun ne’e, PNTL husu ba joven sira no sidadaun hotu ne'ebé sente todan ho moris, sente depresaun, ka sente laiha ona dalan seluk atu labele foti desizaun mesak.

“Iha ema ne'ebé prontu atu rona Ita. Ko'alia ho família, belun, amigu, padre, ka profisionál saúde sira. Sempre iha dalan maske ita sente nakukun,” dehan nia.

Portavoz ne’e husu ba inan-aman, alin, no viziñu sira atu haree didi'ak membru família sira.

“Se sira sees husi komunidade, nonook demais ka hatudu oin triste beibeik, favor ida fó tempu hodi rona sira. Dala-barak rona ho fuan bele salva vida ida. Labele husik sira mesak hasoru sira-nia problema,” dehan nia.

Nia dehan, Komando PNTL konsidera vida mak prezente ne'ebé boot liu. Polísia la'ós de'it atu kaer kriminál, maibé mós preokupa ho seguransa fízika no mentál sidadaun sira nian.

“Se ita-boot haree ema ruma ne'ebé atu koko oho an, favor ida bolu kedas ajuda ka kontaktu Eskuadra besik hodi ami bele ajuda fó protesaun,” dehan nia.

Tuir nia, kazu oho an ne’e mosu tanba despresaun ba problema familia, relasaun domin nian no problema prinsipal mak ekonomia familia uma-laran.