Vizita ne’e halo hafoin jornál no INDEPENDENTE públika notisia kona-ba kondisaun Eviana, ne’ebé moris ho limitasaun no presiza kadeira roda.
Reprezentante husi Prezidensia Repúblika, Felis de Deus Alves hato’o ninia agradesimentu ba Jornal INDEPENDENTE tanba públika ona Eviana nia istoria nune’e entidade sira bele hatene no halo akompañamentu. Nia mós apresia kooperasaun husi autoridade lokal ba esforsu hodi apoiu labarik feto ne’e.
“Ami-nia prezensa iha ne'e tanba informasaun ne'ebé média INDEPEDENTE fó sai. Prezidente Repúblika, José Ramos Horta rasik mós akompaña, entaun nia orienta ami ekipa ida ne'e mak mai iha ne'e," dehan Felis bainhira vizita Eviana, Kinta (06/11).
Felis hatutan, prezensa husi parte Prezidensia Repúblika ho objetivu atu fó apoiu moral no esperansa ba Eviana nia familia katak sira la mesak.
“Atu fó esperansa, enkoraza nafatin família ida ne'e katak sira la mesak maibé Prezidente Repúblika mós nia domin ba família ida ne'e. Ne'ebé Prezidente Repúblika enkoraza nafatin família ida atu ne'e nafatin pasiensia hodi tau-matan ba ita-nia alin ka ita-nia oan ne'e,” dehan Felis.
Aleinde observa kondisaun Eviana, ekipa mós observa kondisaun fiziku uma ne’ebé Eviana hela. Felis garante ninia ekipa sei fila mai hodi lori kadeira roda ka fasilidade seluk.
Ekipa Prezidensia mós ajenda posibilidade vizita kontinuasaun husi PR Horta rasik.
"Ekipa Prezidensia Repúblika aban (ohin) sei mai oras tuku 10 resin, la hatene dala-ruma, ita reza de possivel aban ita-nia Prezidente Repúblika, José Ramos Horta, bele to'o iha fatin ne'e nune'e bele tau-matan, ita agradese, di'ak liu tan ba família ida ne'e.”
Xefe Suku Komoro: Media loke ami-nia matan
Iha tempu hanesan, Xefe Suku Komoro, Eligio José da Silva Marçal, hato’o apresiasaun ba Jornal INDEPENDENTE ne’ebé sai ona ponte entre komunidade ho governu. Nia rekoñese katak molok notisia ne’e públika, parte Suku seidauk hatene Eviana ninia kondisaun.
"Ha'u, Xefe Suku maibé seidauk mai direita, maibé primeiravez ita mai haree duni Eviana nia kondisaun. Maske ho idade kiik, tinan sia, maibé kondisaun toba de'it. Eviana nian ne'e ita haree todan tebes ba família,” dehan nia.
Nia mós esplika katak Sentru Rehabilitasaun Nasionál (SNR) sukat ona Eviana nia isin hodi prepara kadeira rona. Maibé prosesu ne’e hetan atrazu tanba difikuldade atu kontaktu familia.
Maibé, nia hatutan, bazeia ba informasaun ne’ebé Jornal INDEPENDENTE públika, iha 05 Novembru ne’e ekipa SNR mai sukat fila fali, nune’e nia hein katak SNR bele intrega duni kadeira roda ba Eviana.
"Ita husu Sentru Nasionál Rehabilitasaun bele prosesa, depois la presiza família mak tenke ba, sira mak bele mai ho autoridade ka liga ho média hanesan ita-boot sira, bele mai direita. Halo nétik buat di'ak ba Eviana, nune'e bele ajuda nia inan-aman," Xefe Suku ne’e hatete.
Inan nia ksolok
Entretantu, Eviana nia inan, Fernanda Fernandes sente kontente ba vizita husi ekipa Prezidensia no Xefe Suku.
"Ha'u sente kontente tanba na'in hira mai vizita ha'u-nia oan. Bainhira ha'u mesak ha'u haree nia tanis ha'u mós sempre tanis," dehan Fernanda.
Nia espera kadeira roda ne’e sei fó duni iha tempu besik atu Eviana bele tuur no horon anin fresku iha liur.
"Se aban kadeira roda husi Prezidensia Repúblika to'o uluk, ne'e ha'u kontente tebes, no ha'u agradese boot ba Prezidensia Repúblika, ho tan ba na'in hira," katak nia.
Iha biban ne’e, Fernanda mós husu direita ba Xefe Suku Komoro atu rejista ona Eviana nia naran iha lista ema ho defisiensia suku nian, no parte suku promete mós atu rejistu Eviana nia kondisaun, inklui mós kondisaun familia nian.
Simblu preokupasaun estadu
Vizita husi ekipa Prezidensia Repúblika ne’e hatudu forma real husi preokupasaun estadu ba ninia ema ho defisiensia. Liu husi koordenasaun entre media, autoridade lokal, no entidade estadu nian, kazu Eviana sai simblu importante katak publikasaun media bele sai ponte entre povu kiik ho nasaun.
PR Horta liu husi ninia ekipa afirma katak nasaun sei kontinua esforsu atu fó atensaun no fasilidade ba povu ne’ebé presiza, liu-liu labarik defisiensia sira atu sira bele moris di’ak no dignu liu.
