Tuir informasaun ne’ebé publika iha pájina ofisiál Prezidensia Repúblika Demokrátiku Timor-Leste, José Ramos-Horta, ne’ebé Online INDEPENDENTE asesu iha Domingu (06/07), katak, durante tinan ida ona família husi Robino Florival Madeira hela iha baraka ki’ik ida iha area Lagoa I, Tasi Tolu.

Robino hela hamutuk ho nia feen, Francisca dos Santos Bareto, ho nia oan na’in rua (5), kompostu husi feto na'in haat (4) no mane na’in ida (1).

“Sira hotu sei otas ki’ik. Oan-feto primeiro naran bolu Paya ho tinan 10 no oan feto segundo naran bolu Moko ho tinan hitu,” hanesan jornal INDEPENDENTE sita iha pajina FB palasiu PR.

Labarik na’in rua ne’e lakon direitu atu asesu ba edukasaun. Sira na’in rua para estudu iha eskola primária ho razaun família nia kbi’it la to’o.

Maski hela iha situasaun ne’ebé la dignu, família ne’e hakmatek ho esperansa no kontinua buka moris ba oan sira. Robino, nu’udar aman ida kontinua esforsu maka’as no buka meus oioin hado bele sustenta família nia prekupasaun. Dalan ida mak serbisu nu’udar Lixeiru iha Tibar.

“Ha’u hodi tetu sasan sira ne’e mak hetan osan hodi sosa foos no modo ba labarik sira haan, semana ida paling hetan mak $5-$10 dollar, sasan balun haree ba di’ak ne’e lori mai uma hodi uza fali, lona balun di’ak ne’e mak halo ba didin uma ne’e," Robino konta.

Familia ne’e ho ksolok simu prezensa husi ekipa Gabinete Prezidensia Repúblika ne’ebé oferese tulun ba sira.

Koordenadora Jerál Gabinete Servisu Sosiédade Sivil no Assuntu Sosiál, Teresa dos Santos Ximenes, enkoraja família ne’e no promete sei tulun nafatin família ne’e hodi sustenta oan sira bele asesu ba edukasaun.

“Ita-nia Prezidente, saida mak nia haree no sente mak mak nia haruka hela ami mai, lori ita-nia prezidente nia naran apoiu netik nesésidade uitoan, pois ajuda tan ama-apa nia oan feto na'in rua ba hela iha madre sira hodi bele ba eskola, nune'e hamenus todan ne’ebé durante ne’e família sente," hatete Teresa.