Diretór Ezekutivu INDEPEDENTE, José Sarito Amaral hato’o sentidu kondolensia kle’an ba Lu Olo ninia mate.
Nia deskreve Saudozu Lu Olo nu’udar funu-nain no lider boot ida ne’ebé fó kontribuisaun signifikativu durante luta libertasaun no prosesu dezenvolvimentu nasaun.
"Ita triste katak aman lutadór no erói boot ida lakon husi ita-nia leet. Tanba ita sei presiza nafatin nia hamutuk ho lider sira seluk lori rai ida ne'e sai di’ak liu tan,” dehan Sarito hafoin presta omenajen ba Saudozu Lu Olo.
Tuir Diretór ne’e, Lu Olo nu’udar figura ne’ebé kalma tebes, la fasil atu provoka, no respeitu ema hotu, inklui jornalista sira.
Durante sei moris, Lu Olo sempre nakloke no hatan ho pasensia pergunta ne’ebé jornalista sira husu iha intervista hotu-hotu.
“Saudozu nunka hirus jornalista. Sempre atende jornalista sira ho di'ak. Hatan pergunta ho kalma, no respeita tebes servisu jornalizmu,” dehan nia.
Sarito mós konsidera katak, Saudozu Lu Olo laos de’it politiku ida, maibé mós sai nu’udar simbolu estabilidade politika nasional. Iha situasaun politika oioin ne’ebé nakonu ho diverjensia ideia, Saudozu hatudu nafatin ninia kalma.
"Iha diverjensia politika, Saudozu sempre hatudu ninia ulun malirin. Ida ne’e mak halo saudozu maduru tebes iha polítika," nia hatete.
Liu tan, tuir Diretor ne’e, Saudozu Lu Olo iha papel krusial hodi mantein ekilibru politiku iha Fretilin nia laran, hamutuk ho figura seluk hanesan Mari Alkatiri. Sira na’in rua iha karater ne’ebé diferente maibé kompleta malu iha dinamika partidu nian.
Iha biban ne’e, Sarito mós hanoin hikas pedidu husi Jornal INDEPEDENTE atu halo intervista eskluzivu ho Saudozu Lu Olo, maibé la konsege realiza tanba Saudozu ninia kondisaun saude no tenke halo tratamentu iha rai liur.
Saudozu, tuir Diretór ne’e, konsege halo komunikasaun via telefone ho ekipa Jornal INDEPENDENTE hodi esplika katak nia respeita tebes pedidu ne’e, maibé tanba kestaun tempu, nia labele atende.
Nune’e, Lu Olo la’os de’it nu’udar luta-nain no lider nasional ida maibé mós nu’udar figura ne’ebé sai belun ba imprensa, kalma iha hahalok, no husik hela legadu lideransa ne’ebé nakonu ho respeitu ba jornalista.
Editor: Jorgino dos Santos
