Prezidente CCI-TL, Jorge Manuel de Araújo Serrano informa, enkontru ida ne'e realiza tanba pedidu husi Prezidente Repúblika ba CCI-TL atu enkontru regular, treimestrál Xefe Estadu hakarak rona setór privadu no emprezáriu sira iha partisipasaun dezenvolvimentu nasionál, dezafiu saida mak emprezáriu sira hasoru, problema, progressu iha dezenvolvimentu ekonómia ligasaun setór privadu sira nian ba iha OMK, ASEAN, CPLP.

Nia dehan, enkontru ne'e furak tebe-tebes Xefe Estadu rona CCI-TL nia hanoin no CCI-TL mós rona Xefe Estadu no la ses husi kontestetu Timor ne'ebé hotu-hotu preokupa hakarak hadia ita nia rain ida ne'e, atu kontribui ba fó empregu atu mais motiva investimentu no hasa'e produsaun iha rai laran nune'e bele iha sustentabilidade ekonómia iha rai laran.

"Ohin ami ko'alia mós kona-ba dezafiu ba investimentu iha Timor Leste liga ho lejislasaun, iha problema balun ne'ebé ohin Xefe Estadu ko'alia di'ak loos kona-ba polítika protesaun no mós bareira sira ne'ebé implika investór estrajeiru no mós nasionál atu bele halo investimentu," informa Prezidente CCI-TL Jorge Serrano ba jornalista sira hafoin enkontru ho Xefe Estadu iha Palasiu Prezidensiál Bairu-Pite, Tersa (16/04).

Nia esplika, Prezidente Repúblika hatene di'ak problema lejislasaun sira ne'e tanba ne'e ohin Xefe Estadu ho CCI-TL troka ideia no iha informasaun naton atu bele ajuda CCI-TL hodi komunika ho autoridade kompetente hodi solusióna problema lejislasaun ne'ebé sai dezafiu ba investór iha Timor Leste.

Entretantu, emprezária feto, Kathelin Gonçalves espera partidu polítiku ne’ebé hetan fiar husi povu atu forma governasaun períodu 2023-2028, fó prióridade kompleta lejislasaun rai nian atu kria ambiente ne’ebé seguru ba setór privadu hala’o investimentu, nune’e bele kria kampu servisu ne’ebé bo’ot ba joven sira hodi kontribui eleva povu nia moris.