Oan Soru hatete, bainhira tama partidu politika no halo juramentu signifika sei hamate demokrasia.

“Imi jura tama politika, demokrásia mate, estraga imi-nia futuru, tanba imi jura tiha buat sala mós (sai) loos,” dehan Oan Soru bainhira hala’o kampaña ba kandidatu Prezidente Repúblilka númeru 14, José Ramos Horta, iha munisipiu Kovalima, Kuarta (09/03).

Nia husu ba Kovalima-oan sira atu atensaun no matan-moos hodi labele halo juramentu ba partidu politiku ida.

“Imi-nia lisan, imi iha fatuk hadak, imi iha aihun, kesi imi-nia abut ne’e, imi bele halo buat seluk, maibé jura ba politika ne’e oho imi-nia aan, oho imi-nia futuru,” katak nia.

Nia husu ba joven sira atu para ona ho juramentu, tanba juramentu sei oho sira-nia an rasik no sei lori nasaun ba dirasaun ne’ebé la klaru.

Iha fatin hanesan, Prezidente Partidu CNRT, Kay Rala Xanana Gusmão husu atu hotu-hotu hakmatek no labele provoka malu.

“Tanba iha Baukau husi governu ai-tonka nia ema baku-malu, oho-malu, neduni, ita iha Suai tenke kria estabilidade, rona, hakmatek,” dehan nia.

Nia hatete, ekipa kontinua halo door to door, maibé labele provoka malu tanba tenke garante estabilidade ba eleisaun ninian.

“Ema hakilar ba mai, taka tiha tilun, labele rona, ema insulta ita karik, provoka ita, tau lixu, iha ita-nia tilun ba de’it, lalika rona,” nia apela.

Entretantu, Partidu Politiku Khunto koñesidu nu’udar partidu ne’ebé aplika juramentu ba sidadaun sira ne’ebé hakarak tama ba sira-nia partidu.

Aleinde juramentu hodi sai membru, iha mós juramentu atu bele hetan kargu balun iha instituisaun estadu ka governu.