Traballadór Timor oan sira iha rai laran besik tinan 10 ona, maibé salariu baziku mate ho $115, ne’e la iha ona ballansu ho folin sasan iha merkadu.

Revizaun salariu baziku tuir loloos tinan rua-rua halo dala ida, maibé governu seidauk bele halo revizaun, maske besik tinan 10 ona, entaun presiza ona atu haree ba kestaun ne’e hodi fó moris ba servisu nain sira.

“Buat hotu-hotu ne’ebé mosu iha mundu ne’e obra traballadór sira nian, entaun ita presiza dignifika sira, ita presiza kria kondisaun atu sira bele moris dignu nudar servisu nain iha nia rain rasik,” dehan nia, iha kampu Kulau Bekora, Sabadu (12/03).

Assanami dehan,  presu sasan oras ne’e iha merkadu sa’e ba bebeik, maibé salariu baziku kontinua hanesan ne’e nafatin entaun servisu nain sira labele haruka oan ba eskola, sira labele sosa hahan ne’ebé nútritivu, sira labele hela uma diak.

Tanba ne’e, Prezidente Repúblika iha papel ida importante hodi promove politika mudansa salarial nian, kestaun ne’e la’os Xefe Estadu nia papel, maibé sei orienta governu atu haree ba kestaun ne’e.

Dadaun ne’e iha ona SEFOPE, Sindikatu Traballadór no CCI-TL sira mak iha kompetensia atu halo revizaun, tanba ne’e PR sei governu para bele aselera.

Atu atinje mehi sira ne’e mak presiza forsa ida mai husi povu atu hatur prezidente ida ne’ebé diak diak atu nune’e rezolve lalais, la’e situasaun sei nune’e nafatin.