"Ohin, ha'u hamutuk ho ekipa susesu sira halo mini kampaña iha ne’e, maibé ha’u hare merkadu Atabae ninia kondisaun hanesan fahi luhan," deklara Angela Freitas ba jornalista bainhira hala’o dialogu ho komunidade sira iha Merkadu Atabae Villa, (11/03).

Nia kestiona katak, kada tinan governu halo aprovasaun Orsamentu Jeral Estadu, maibé orsamentu hirak ne’e la to’o ba povu iha base.

"Bainhira eleitu sai Prezidente Republika, iha ha'u nia mandatu orsamentu ne'ebé la refleta ba povu nia interese, ha'u sei haruka fila,'' tenik nia.

Nia dehan, povu iha dereitu atu asesu ba merkadu ne’ebé ho kondisaun di’ak, tan ne’e presiza duni hadia kondisaun merkadu Atabae, maibé hanusa maka sira la hadia, ida ne’e fila fali ba lideransa sira nia kapasidade.

Nia konsidera, buat ne’ebé lideransa sira halo ne’e, krimi hasoru nasaun no povu, tan ne’e tempu to'o ona no povu tenki matan moos hodi hili lideransa ne'ebé ho kapasidade sufisiente, atu hili lideransa ne’ebé hadomi nia povu no iha visaun ne’ebé luan hodi hadia fila-fali insfraestratura.

Ida ne'e responsabilidade estadu atu hala’o nia kna'ar hodi konstrui insfraestratura ne'ebe ho kondisaun diak no dignu, nune’e povu bele uza hala’o negosiu.