Ministru José Honório hatete, bainhira governu transforma eskola ETCI husi privadu ba públiku, ne’e onra ida, tanba luta ida la’ós fasil, maibé hanesan timoroan tenke halo diak ba nasaun.

Nune’e, importante maka, Ermera tenke iha Instituisaun Públiku ida atu bele servi nasaun ne’e ba futuru.

“Iha situasaun balun ha’u tenke esforsu ha’u nia-aan, koalia diak atu bele halo diak ba Ermera, simples deit, sé ita tau eskola superior ida iha Ermera, ne’ebé halai liu ba Kafe, signifika Jovem barak hakarak mai eskola iha ne’e,”dehan nia liu husi diskursu iha ambitu serominia graduasaun ba estudante finalist sira iha Universidade ETCI, ne’ebé remata ona kursu formasaun baixerelatu no lisensiatura, ne’ebé hala’o iha Universidade ETCI, Glenu, Munisipiu Ermera, Segunda (15/12/25).

Nia dehan, transformasaun eskola privadu ba publiku ne’e la’ós kiik maibé boot ba povu Ermera iha futuru.

“Tanba ne’e, komprimisiu governu nian maka sei hadia edifisiu ETCI ho diak no sei halo mós dormitoriu ba estudante no professor sira, inklui harii mós salaun multifunsaun ida ba universidade ETCI, ba komunidade Ermera tomak, liliu ba estutdante sira atu bele uza ba prosesu aprendijazen nian,”tenik Ministru José.

Aleinde ne'e, Ministru José afirma, sei hadia mós lutu ka moru protesaun iha Universidade refere.

Entretantu, tuir dadus, hahú husi inisiu Universidade ne’e hari to’o ohin loron, fó ona graduasaun ba finalist sira hamutuk na’in 1.160.