DILI: Prezidente Repúblika, José Ramos-Horta, ohin kondekora Primeiru-Ministru no Ministru Finansas Repúblika Singapura, Lawrence Wong, ho Ordem Timor-Leste (Grande Colar), kondekorasaun aas liu hosi Estadu Timor-Leste, iha serimónia ofisiál ne'ebé realiza iha Palásiu Prezidensiál, Dili.
Tuir komunikadu ne’ebé online INDEPENDENTE asesu katak Kondekorasaun ne'e reprezenta ekspresaun boot ida hosi povu no Estadu Timor-Leste atu hato'o agradesimentu bá Primeiru-Ministru Lawrence Wong no povu Singapura tanba sira-nia amizade metin, solidariedade no kontribuisaun importante bá dezenvolvimentu Timor-Leste durante tinan barak.
“Singapura mós sai parseiru estratéjiku ida ne'ebé fó apoiu konstante bá Timor-Leste, liuliu iha área dezenvolvimentu rekursu umanu, formasaun lideransa, fortalesimentu instituisaun públika, dezenvolvimentu ekonomia no apoiu forte bá prosesu adezaun Timor-Leste bá ASEAN,” Sita komunikadu.
Kondekorasaun ne'e mós rekoñese lideransa no kompromisu pessoál Primeiru-Ministru Lawrence Wong atu hametin relasaun bilaterál entre Timor-Leste ho Singapura, no promove kooperasaun ne'ebé fó benefísiu bá povu nasaun rua.
Serimónia ne'e realiza durante vizita ofisiál Primeiru-Ministru Lawrence Wong iha Timor-Leste, ne'ebé marka vizita dahuluk hosi lider governu Singapura bá nasaun ida-ne'e desde estabelesimentu relasaun diplomátika entre nasaun rua.
Vizita ne'e mós reforsa amizade, kooperasaun no kompromisu atu haburas relasaun bilaterál iha futuru.
Primeiru-Ministru Lawrence Wong Shyun Tsai konsidera kondekorasaun ne'e la'ós bá nia an rasik, maibé bá Singapura no povu Singapura ne'ebé kontribui bá amizade entre nasaun rua, no mós povu Timor-Leste ne'ebé simu ho amizade no jenerozidade.
Lawrence Wong Shyun Tsai orgullu no elojia ho istória Timor-Leste, no dehan futuru nasaun ida la depende de'it bá nia rekursu naturál, maibé bá korajen hosi nia povu, forsa iha konviksaun no kapasidade atu supera difikuldade sira.
