Jenito ne’ebé moris iha Munisipiu Vikeke, iha 8 Junu 1992 ne’e preparadu ona hodi kandata an sai nu’udar Xefe Suku iha suku Kamea, Postu Administrativu Kristu Rei, Munisipiu Dili.

Oan-mane mesak husi feton na'in 4, husi inan-aman, Augusto Jordao Bosco ho Ana Maria Miguel de Araujo (matebian), ne’ebé baibain bolu ho naran Nobai ne’e hahú ninia estudu iha eskola primaria Sagrada Coracão de Jesus Bekora husi tinan 2000 to’o 2006.

Nia kontinua ninia estudu iha nivel Pre-sekundaria iha eskola hanesan husi tinan 2006 to’o 2009.

Hafoin ida ne’e, kontinua ba eskola Sekundaria iha eskola Sekundariu Publiku 12 Novembru Bekora husi tinan 2009 to’o 2012.

Hafoin remata estudu iha nivel Sekundariu, Nobai kontinua nia estudu iha Universidade Dili, foti fakuldade Siensia Politika, Departamentu Relasaun Internasional. Nobai gradua iha tinan 2018.

Durante hala'o estudu iha nivel universitariu, Nobai ativu mós iha organizasaun sosial sira ne'ebé sempre defende ema kbi'it laek sira-nia direitu. Husi organizasaun lubuk ne’ebé nia hola parte, Nobai ativu liu husi organizasaun CUP no MUTL.

Iha tinan 2023, bainhira mosu eleisaun ba lideransa suku, Nobai mós hatudu ninia interese atu kompete.

Razaun husi foin-sa’e ne’e hakarak kandidata an ba Xefe Suku mak hakarak sai servidor ne'ebé di'ak hodi serbi povu iha suku refere ho dignu no transparente.

"Ha'u hakarak kandidata an ba xefe suku ho razaun hakarak atu servi komunidade ho dignu, transparansia no ho responsabilidade tuir konstituisaun haruka," dehan nia.

Ho idade ne'ebé sei joven no ho estudu ne’ebé Nobai hala’o ona, nia sente katak nia tenke hola parte iha ukun hodi halo mudansa ba povu.

Durante ne’e estudu, Nobai sempre hakilar kona-ba defende direitu povu nian. Tan ne’e tempu ona ba nia atu tuun direita hodi defende povu nia direitu.

Bainhira hetan fiar husi komunidade sira iha Kamea, Nobai hatete, nia sei implementa programa ne'ebé tuir nia bele lori mudansa ba povu iha suku ne'e.

Nobai hatutan, bainhir nia hetan fiar, nia sei halakon ukun ho arogansia, hamutuk ho sosiedade liu-liu estrutura suku halakon korrupsaun, halakon sistema familiarizmu iha atendimentu sira, hala'o edukasaun sivika ba komunidade sira hodi kombate mentalidade rasismu ne'ebé bele provoka konflitu entre komunidade, no seluk tan ne'ebé bele fó ameasa ba estabilidade seguransa iha suku Kamea.

“Hanesan xefe suku sei esforsu kria atividade ba joven sira hanesan hala'o desportu komunitariu ne'ebé akumula area desportu sira ne'ebé maioria joven sira hakarak hanesan futebol salaun (Futasal), futebol, basket inklui volleyball,” dehan Nobai foin lalais.

Programa prinsipal seluk, nia dehan, nia sei halo komunikasaun no kooperasaun di'ak ho suku vizinu, liu-liu haree lisuk seguransa nune'e entre suku.

Programa seluk mak, komunika no koopera ho parte saude, liu-liu sentru saude postu Kristu Rei, hodi bele halo atendimentu direita ba komunidade sira ne'ebé hela do'ok husi sentru saude, inklui hadi'a sistema atendimentu ba inan-aman idozu sira atu bele hetan sira-nia direitu ho dignu, liu husi fasilita prosesu pagamentu ne’ebé di'ak liu tan.

Programa tuir mai, nia dehan, komunika ho parte kompetente hodi bele halo kanalizasaun bee-moos ba uma-kain sira, nune’e komunidade sira labele kontinua halerik ba bee-moos.

Iha ninia mandatu nu’udar Xefe Suku, nia promete atu halo atendimentu ba komunidade sira ne’ebé presiza durante oras 24 nia laran.

“Prontu 24 oras halo atendimentu ba komunidade sira ne'ebé presiza iha situasaun urjente ruma, no sei hametin relasaun di'ak ho aman-inan, veteranu, komunidade sira, inklui servisu hamutuk mós ho parte relijiaun hirak ne'ebé eziste iha suku ne'e hodi rona no simu ideia hotu ne'ebé mai husi sira ba suku ne'e ninia di'ak.”

Tanba komunidade Kamea barak mak moris nu'udar agrikultor, liu-liu halo toos, Nobai sei esforsu atu ko'alia ho parte kompetente hodi fó apoiu atu dezenvolve komunidade nia toos sai di'ak liu, atu nune’e rezultadu husi toos refere aleinde ba konsumu, bele ba fa'an hodi hadi'a ekonomia uma laran.

Programa ikus mak sei hadi'a no dezenvolve suku sai modernu liu husi programa edukasaun naun-formal, harii kursu lian Inglesh no komputador ba joven sira.

"Sei dezenvolve suku sai modernu. Purezemplu, sei identifika joven potensial sira, liu-liu hirak ne'ebé iha vontade hakarak aprende sei loke formasaun ba lingua Inglesh, komputador no seluk tan, ho objetivu forma joven sira hodi hatene no koñese kle'an liu tan kona-ba teknolojia," katak Nobai.