Foin-sa’e ida, Luciano Cipriano, ne’ebé moris iha Baukau, iha 19 Setembru 1985 ne’e, sei ba kompete iha eleisaun lider komunitaria ho vizaun ‘Hamutuk ho Komunidade Harii Suku ne’ebé Progresivu’.

Oan mesak husi Silveiro Cipriano no Albertina de Jesus ne’e hahú nia estudu iha eskola Primaria EBC Daralata husi tinan 1992 to’o 1999. Kontinua iha Pre-sekundaria Jeral Venilale iha tinan 2000 to’o 2002 no kontinua ba Sekundariu Jeral Venilale husi tinan 2002 to’o 2005.

Hafoin ramata ninia estudu iha nivel Sekundariu, Luciano la kontinua ba universitariu. Maske nune’e, nia nunka baruk atu aprende, tanba ba nia, aprende mak dalan di'ak ba susesu iha futuru. 

Iha tinan ida ne’e, Luciano deside atu kompete iha eleisaun ba lider komunitaria iha suku Baha Mori.

Bainhira hetan duni konfiansa, Luciano sei mobiliza rekursu no ninia koñesimentu hodi buka solusaun ba nesesidade komunidade ninian.

"Razaun atu kandidatu aan tanba ita hotu hatene populasaun ninia preokupasaun durante ne’e haree ho matan, liu-liu ezijensia prinsípal sira mak hanesan bee-moos, eletrisidade, estrada no ba juventude sira-nia preokupasaun mak iha area desportu no muzika," dehan Luciano ba Jornalista Jornal INDEPENDENTE.

Luciano hatete, ninia kandidatura ne'e tanba suporta husi familia, liu-liu juventude sira iha Suku Bahamori tanba hakarak iha mudansa.

"Ha'u hakarak kandidatu aan ba Xefe Suku tanba família sira suporta, inklui juventude sira aseita ona. No, juventude sira mak sei sai ekipa susesu, nune’e hamutuk bele prepara materia no programa atu informa ba populasaun sira, nune’e bele hetan konfiansa."

Maibé, nia konsiente katak atu sai lider la fasil, maibé ho esperensia ne’ebé nia iha nu’udar jornalista iha instituisaun media balun, no hetan mós fiar hodi sai nu’udar media officer Ministériu Turizmu, Komersiu no Industria, iha governasaun daualu, Luciano deside hodi kompete iha eleisaun.

Bainhira eleitu, Luciano sei esforsu hamutuk ho povu hodi dezenvolve no rezolve problema ne'ebé suku Baha Mori enfrenta durante tinan barak ninia laran.

Figura Luciano la’os foun iha Baha Moris, tanba nia mós hala’o ona atividade balun iha suku refere.

"Iha tinan 2014 ha'u ho maluk juventude sira harii sentru ida hanaran Centro Juventude Mata Dalan ba Dezenvolvimentu, ami organiza jogu komunitariu iha suku no loke mós treinamentu jornalizmu ba foin-sa'e sira."

"Ho esperiensia ne’ebé iha, ne’e la kestionável, tanba ha'u durante ne'e envolve iha mundu jornalismu tinan barak nia laran, hodi halo kobertura iha área rurais, iha ne’ebé ha'u rasik sente no hatene klaru kona-ba preokupasaun populasaun nian," dehan nia

Nia kompromete, bainhira hetan fiar sai Xefe Suku, nia sei tau prioridade hodi dezenvolve di'ak liu tan setor agrikultura hodi hasa’e produsaun.

Atu realiza ida ne’e, Luciano hatete, nia sei komunika ho parte kompetente sira atu apoiu komunidade hodi transforma sira husi agrikultor tradisional ba modern.

Aleinde dezenvolve seitor agrikultura, nia mós sei tau prioridade maka’as liu tan ba juventude sira.

Programa ba juventude sira ne’ebé Luciano planeia mak desportu komunitariu, ho objetivu atu promove no halo juventude sira iha atividade ne’ebé saudavel no pozitivu hodi hado'ok an husi konflitu.

Liu husi programa refere, nia dehan, bele haree abilidade husi juventude sira no sei komunika ho parte kompetente atu bele dezenvolve di'ak liu tan sira-nia talentu, ne’ebé ikus mai sei hamoris jogador ne'ebé di'ak.

Mane ho idade tinan 38 ne’e afirma, nia kandidata an ba Xefe Suku ho motto ‘Mai atu Servi La’os atu Ukun’.

Tanba, tuir nia, sai lider atu servi ho fuan no laran tomak hodi lori ksolok ba povu.

Hanesan foin-sa’e ida, Luciano lakohi atu hato'o promesa barak, maibé bainhira eleitu nia sei implementa planu prioridade barak ne'ebé iha hodi hadi'a suku refere.

"Programa ne'ebé sei implementa bainhira manan eleisaun ne'e barak. Servisu iha nono'ok laran husik rezultadu mak barullu," katak nia.