Liu husi kontratu ne'ebé entre Bee Timor Leste ho Kompaña Helfia Unipesoal.Lda atu implementa projetu melloramentu sistema bee moos iha suku rua iha postu administrativu Uatukarabau Munisipiu Vikeke.
Prezidente BTL, EP Carlos Peloi hatete, asina kontratu ho kompaña lokál ne'e, atu fornese bee moos ba iha komunidade sira-nia suku Irabin de Baixo ho Suku Uani-uma.
"Hanesan babain oinsa ita atu liberta uluk sistema bee mos kapital postu administrativu sira, ita iha postu 49 ne'ebé la’os parte husi munisípiu ninian, no ohin ita asina tan kontratu siginifika ita-nia prezensa ita kapten ne'ebé sei iha hamutuk 24," dehan Prezidente iha Salaun BTL, EP Kaikoli, Segunda (25/03).
Nia dehan, benifisariu ba projetu ne'e, besik uma kain rihun ida resin ho nia orsamentu millaun $1.334,472,11.
Nune'e Prezidente BTL husu ba kompaña atu iha obrigasaun implementa projetu bee tuir kontratu ne'ebé iha.
Diretora Helfia Unipesoal.Lda Domingas Maria Fátima Ximenes hatete, iha tempu badak sei implemeta ona projetu bee no kompaña promete sei esforsu hodi halao servisu ne’e ho di’ak, tuir kontratu ne'ebé iha.
"Servisu ba oin nian, kompaña sei esforsu an tomak hodi halo servisu ne'e ho di’ak liu tuir kontratu ne'ebé mak ha'u asina ona no tuir termus ne'ebé hakerek iha kontratu nia laran nune'e kompaña sei esforsu hodi halo servisu didi’ak no bele remata iha tempu ne'ebé iha kontratu," nia hato'o.
Iha biban Ne'e, Xefe Suku Irabin de Baixo José Batista do Carmo hatete iha selu refere iha aldeia tolu mak seidauk asesu bee moos.
Tanba nee hanesan autoridade lokal prontu atu kopera ho BTL no kompaña atu selera lalais projetu refere nune'e komunidade bele asesu ba bee moos.