Tuir orariu ne’ebé iha, prosesu julgamentu ne’e hala’o iha Sesta (21/04) dader, maibé tanba Juiz Koletivu balun, Ministériu Públiku no Defensór Públiku la marka prezensa, julgamentu ne’e adia ba 13 Outubru 2017 tuku 9:00 dader.
Tuir Juiza ne’ebé kaer prosesu, Jacinta Correia, julgamentu ne’e adia tanba Juiz koletivu, Ministériu Públiku, no Defensór Públiku la marka prezensa.
Entretantu, kona-ba kazu OIFA, tuir akuzasaun husi Ministériu Públiku, kazu ne’e akontese iha 14 Agostu 2014 tuku 3:00 loraik iha Munisipiu Ermera ne’ebé envolve husi arguida Ata, arguidu Aco no arguidu Afo (la’os naran loos) hasoru lezadu Ate, Alo no Ton (la’os naran loos).
MP konta tuir katak, iha 14 Agostu lezadu sira ba arguida nia uma atu rezolve problema umane ho mane-foun, entre arguida Ata ho nia laen JB, maibé tanba to’o lorokraik la konsege rezolve sira deside atu muda ba loron 20 Agostu.
Maibé, arguida hahú nervozu no lori besi-kanu baku ba lezadu Ate nia ulun, hasan karuk no loos no arguidu seluk. Arguidu Aco lori ai pedasuk baku dala-barak iha lezadu nia hasan ne’ebé rezulta lezadu monu ba rai, kanek iha ulun suku pontu 5 no nehan nakdoko hotu.
Atetude arguidu sira ne’e halo lezadu sofre no tenke haan sasoro de’it no baixa iha Hospital Gleno no Hospital Nasionál Guido Valadares durante fulan ida nia laran.
“Lezadu gasta osan ba nesesidade lor-loron hamutuk $60 dollar no husu indeminizasaun sivil ba arguidu Aco $1.000 dollar,” deklara MP iha ninia akuzasaun.
Liu tan MP hatete, bainhira Ate monu ba rai, lezadu Alo ba sori netik maibé arguida Ata lori besi-kanu baku dala ida iha Alo nia rentos, rezulta lezadu monu ba rai no kanek, suku pontu 7 no baixa iha Ospital Gleno durante fulan ida no gasta osan ba nesesidade lorloron hamutuk $50 no husu indeminizasaun ba arguida $1.000.
Bainhira haree Ata lori besi-kanu no lezadu Ate monu, derrepende de’it arguidu Afo lori katana ta’a iha lezadu Ton nia hasan karuk, rezulta kanek, ran sai barak no dezmaia. Lezadu baixa iha Hospital Gleno durante fulan rua no gasta osan ba nesesidade lorloron $1.000 no husu indiminizasaun ba arguidu $6.000.
MP akuza, arguidu na’in tolu (3) ho forma livre, deliberadamente, konsientemente, lori besi-kanu, ai pedasuk no lori katana ta’a lezadu na’in tolu (3) ne’ebé rezulta sira hetan kanek iha fatin atijida.
“Arguidu hatene katak hahalok ne’e proibidu no hetan punisaun tuir lei penal maibé kontinua pratika asaun ne’e,” deklara MP.
Tanba ne’e, MP akuza arguidu sira sai hanesan autor material ba forma konsumada ho krime Ofensas Integridade Fizika Agravadu tuir artigu 146 kodigu penal.
