Print this page

UNAER Ezijé Direitu ba Toos-Nain Sira Featured

By Cristina Ximenes Maiu 02, 2019 18528
UNAER hamutuk ho traballador sira halo asaun pasifika hodi selebra loron mundial traballadores iha Dili UNAER hamutuk ho traballador sira halo asaun pasifika hodi selebra loron mundial traballadores iha Dili

DILI:Prezidente Uniaun Agrikultura Ermera (UNAER), Alberto Guterres ezije atu entrega hikas toos-nain sira-nia rai ne’ebé kolonialista sira okupa.

“Tempu ona ita harahun kolonialista sira ne’ebé sei invade ita hodi hada’u ita-nia direitu. Ita tenke unifika ita-nia forsa hodi liberta aan husi injustisa sosial”, dehan nia.

Alberto hatete, politika UNAER atu reforma agraria hahú ona husi Eremera no Likísa no hein katak ba oin sei habelar ba munísipiu tomak atu nune’e bele hada’u fali rai ne’ebé kolonialista sira okupa hodi fó ba toos-nain sira atu utiliza hodi halo atividade agrikultura nian.

UNAER kritika mós politíka governu atu hametin ekonomia familiar ne’ebé tuir sira la tau ba asaun.

“Politíku sira reprezenta povu ne’e iha tempu kampaiña de’it maibé liu tiha sira sai ona deputadu iha Parlamentu Nasionál sira reprezenta nia aan no nia partidu de’it hodi defende mak karreta Prado no defende Pensaun Vitalisia,” dehan nia.

Nia dehan, konseitu atu hasa’e kresimentu ekonomia familiar ne’e mai husi baze liu husi esforsu povu kiik ne’ebé halo natar no toos iha baze maibé problema mak ohin loron rai sei problematizadu.

Nia kestiona, bainhira povu hakarak halo toos no natar maibé laiha rai no kolonialista sira ne’ebé halai ba ona nasaun seluk tinan barak ona maibé sei fila mai reklama rai iha Timor, oinsá atu povu bele hamoris sira-nia ekomia rasik.

Tanba ne’e, Alberto dehan, liu husi loron importante ne’e toos-nain sira hamutuk ho traballadór sira seluk ezije sira-nia direitu hodi kontra injustisa sosial.

Aleinde ne’e, UNAER mós kritika funsionariu instituisaun estadu nian ne’ebé la marka prezensa iha asaun iha loron trabaladór sira.

Tuir nia, ida ne’e tanba dala-barak ema interpreta katak traballadór ne’e ema sira ne’ebé kaer ai-suak halo toos, halo natar no sira ne’ebé kahur sumenti, hiit sasán iha loza, maibé sira ne’ebé serbisu iha instituisaun estadu la’ós traballadór.

“Iha komemorasaun loron traballadór sira ne’e funsionariu estadu la marka prejensa tanba sira hanoin katak sira la’ós serbisu-nain, maibé hein katak ba oin sira bele komprede nune’e bele hola parte iha komemorasaun loron importante hanesan ne’e,” dehan nia.

Rate this item
(0 votes)