Tersa, 18 Dezembru 2018 | Login
Prezidente Repúblika Francisco Guterres Lú Olo kondekora ho “Medalla de Méritu” ba atleta ho defisiénsia Teófilo Freitas no atleta Pascoela Pereira dos Santos. FOTO: Media PR Prezidente Repúblika Francisco Guterres Lú Olo kondekora ho “Medalla de Méritu” ba atleta ho defisiénsia Teófilo Freitas no atleta Pascoela Pereira dos Santos. FOTO: Media PR

PR Lú Olo Kondekora Atleta Teófilo-Pascoela ho Medalla Méritu Featured

DILI: Prezidente Repúblika Francisco Guterres Lú Olo, iha ámbitu komemorasaun Loron-Mundiál Ba Ema Ho Defisiénsia, dekreta liu husi Dekretu-lei nú. 52/2018, kondekora ho “Medalla de Méritu” ba atleta ho defisiénsia Teófilo Freitas no atleta Pascoela Pereira dos Santos,

ne’ebé foin lalais ne’e hamorin Timor-Leste nia naran iha Asian Para Games, ne’ebé realiza iha Indonézia.

Teófilo Freitas hetan medalla osan-mean rua no Pascoela hetan medalla osan-metan (bronze), liu husi atletizmu.

Prezidente Repúblika, Francisco Guterres Lú Olo konsidera atleta ho defisiénsia na’in rua ne’e hatudu ona rezultadu ne’ebé pozitivu tetebes. Ba dahuluk, Timor-Leste konkista medalla iha Asian Para Games.

Tuir Prezidente Repúblika, esforsu ne’ebé atleta sira ne’e hatudu, merese hetan rekoñesimentu no valorizadu husi Estadu. Kada medalla osan-mean ne’ebé konkista iha eventu kompetisaun desportiva internasionál hanesan ne’e, loke dalan atu hasa’e ita-nia bandeira nasionál no ita-nia ínu nasionál toka iha Estadu Aziátiku sira-nia oin.

Xefe Estadu realsa laiha susesu ida sein esforsu no susesu ne’ebé atleta na'in rua hetan tanba sira-nia dedikasaun. Prezidente Repúblika espera espíritu dedikasaun ne’ebé atleta na’in rua hatudu ona bele enkoraja no eleva mós espíritu dedikasaun joven timoroan sira seluk, hodi prestíjiu nasaun no hametin sentimentu orgullu nasionál hanesan timoroan.

Medalla de Méritu kria liu husi Dekretu-lei nú. 15/2009, 18 Marsu ,hodi rekoñese no agradese ba militár, polísia no ema sivíl sira, nasionál ka internasionál, ne’ebé serve ona nasaun timoroan, hodi reforsa orden sosiál no kontribui liu husi asaun oioin, ba pás no ba estabilidade nasionál.

Read 144 times
Rate this item
(0 votes)