Tersa, 18 Dezembru 2018 | Login
Segundu Komandante PNTL Munisípiu Dili, Superintendente Asistente Euclides Belo Segundu Komandante PNTL Munisípiu Dili, Superintendente Asistente Euclides Belo

Polisia Bandu Karavana Depois Rona Rezultadu Ezame Featured

DILI: Ministériu Edukasaun sei fó sai rezultadu ezame ba estudante finalista Eskola Primária no Sekundária iha territóriu Timor-Laran tomak, iha Kuarta (5/12), semana oin.

Ne’e duni, Polisia Nasionál Timor-Leste (PNTL) aviza atu estudante sira ne’ebé pasa ezame atu labele halo karavana (pawai) hafoin simu rezultadu ezame.

Iha Dili, PNTL munisípiu sei haforsa vijilánsia iha kada eskola, inklui dalan públiku sira, tanba simu pedidu husi Inspetór Edukasaun no Diretór Edukasaun Munisípiu Dili.

“Ita simu kontaktu husi parte autoridade kompetente Ministériu Edukasaun nian atu husu ita nia apoiu seguransa ba eskola sira, iha Kuarta (5/12), tanba sei iha anunsia rezultadu ezame nasionál, iha eskola sira”, dehan Segundu Komandante PNTL Munisípiu Dili, Superintendente Asistente Euclides Belo iha servisu fatin, Kaikoli, horisehik.

Pedidu ministériu nian komandu hatama ona iha planu operasaun no komandante operasaun hetan ona informasaun hein de’it atu ezekuta.

Operasaun vijilánsia ne’e sei envolve mós polisia espesiál, inklui Polisia Militár (PM).

“ita sei la autoriza estudante sira atu halo karavana. Ita sei orienta sira atu fila ba ida-idak nia uma depois simu rezultadu ezame nasionál. Bainhira estudante sira hakarak halo nafatin karavana ita sei foti medida hasoru sira”, tenik nia.

Nune’e, anunsia mós ba estudante sira iha kapitál Dili atu labele lori tua no arma, inklui atributu sira seluk iha loron anunsia rezultadu ezame nasionál.

“ami orienta ona membru sira atu pasa revista ba estudante sira para labele lori tua no armas inklui atributu seluk ne'ebé laiha relasaun ho edukasaun nian. Se mak kontra Polisia sei foti medida”, dehan Euclides.

Asaun ne’e Polisia halo para atu ajuda inan-aman sira atu labele lakon sira nia oan. Tanba tinan kotuk Polisia aplika regra sira ne’e laiha estudante ida mak lakon sira nia vida tanba asidente ruma.

Maibé, iha 2014 no 2015 fó fatin ba estudante sira, ikus mai barak mak lakon sira-nia vida, balun mout iha tasi. Ne’e duni Polisia hakarak ajuda família sira atu haree sira nian oan kontinua ba universidade.

“Obrigadu” ba profesór no inan-aman

Entretantu, Bispu Dioseze Dili, Don Virgílio do Carmo da Silva, bainhira prezide misa agradesimentu iha Igreja Katedrál-Dili, horisehik, konvida ema hotu halibur hamutuk molok atu taka tinan 2018 hodi fó obrigadu ba profesór no inan-aman ne’ebé durante tinan tomak akompaña hodi dedika, eduka labarik no estudante iha prosesu hotu.

Nu’udar labarik no joven, hotu-hotu buka matenek, maibé hetan tiha matenek ne’e oinsá ita tenke agradese ba profesór no inan-aman ho liafuan “obrigadu” tanba dala ruma estudante sira susar atu fó obrigadu ba edukadór no sira la hatene katak inan-aman buat hotu ne'ebé sira halo ba oan sira, maibé dala ruma nunka agradese ba inan-aman nia sakrifísiu.

Nia dehan, ema balun inan-aman emprezáriu boot ne'ebé atu fó osan sentavu 50 ba oan ne’e fasil, maibé ba sira ne'ebé halo toos tenke servisu makas foin bele hetan sentavu 25 hodi fó ba oan sira ba eskola, maibé oan sira nunka hanoin atu fo obrigadu.

Nune’e, Ministra Edukasaun Juventude no Desportu, Dulce de Jesus Soares hateten, misa ne’e hanesan tempu ida Ministériu Edukasaun hamutuk ho labarik, estudante, profesór sira atu agradese ba Maromak hodi ensera tinan 2018.

Iha fulan-Janeiru, husu nafatin Amu Bispu nia disponibilidade hodi organiza fali misa abertura ba tinan 2019 nian atu bele hetan kbiit no forsa hodi bele hala’o servisu di'ak iha tinan tuir mai.

Read 354 times
Rate this item
(0 votes)