Paixão Fó Orden ba F-FDTL-PNTL Atua Konflitu ho Rigorozu Featured

By Tome Amado Fevereiru 14, 2019 6847
Ministru Defeza no Interior, Filomeno Paixão. FOTO: Doc Ministru Defeza no Interior, Filomeno Paixão. FOTO: Doc

DILI: Ministru Defeza (MD) hatun ona diretiva ba Xefi Estadu maior  FALINTIL Forsa Defeza Timor Leste (F-FDTL), Major Jenerál Lere Anan Timur ho Komandante Jerál Polisia Nasionál Timor Leste (PNTL) Komisáriu Júlio da Costa Hornay, atu orienta membru sira halo atuasaun ho medidas rigorozu ba kualker sidadaun ne’ebé komete krime.

“Atuasaun ne’ebé ha’u fó ne’e la iha limitasaun, bainhira konflitu sei iha, operasaun mós kontinua iha. Maibé, konfrontasaun hotu mak alerta hapara operasaun,” dehan Meno Paixão ba Jornalista iha Palásiu Governu Dili, Tersa (12/2).

Governante nee husu forsa sira tenke atua ho rigorozu, tanba situasaun sira ne’e halo komunidade la’o mós ta’uk, tanba deit atitude grupu balun ne’ebé gosta provoka situasaun.

Ne’e duni, orienta F-FDTL ho PNTL kontinua mantein seguransa ho rigorozu liu-husi operasaun ne’ebé hetan diretiva husi governu.

Bainhira autór ka grupu balun ne’ebé gosta provoka situasaun, instituisaun estadu rua ne’e la tolera aktu ne’ebé impede komunidade nia atividade, tanba povu hakarak hakmatek.

Tanba ne’e Polisia ho Militar ezekuta ona orden ne’ebé hatun husi Governu halo operasaun konsegue kaptura ona autór ba kriminozu durante provoka situasaun, hodi submente ba investigasaun.

Entretantu, oras ne’e daudaun, parte Polisia Nasionál Timor Leste munisipiu Dili kontinua hala’o operasaun la’o ain, hodi prevene konflitu iha bairru sira iha Dili laran.

Alende ne’e, seksaun tránzitu munisipiu Dili mos kontinua hala’o pasa revista iha estrada publiku hodi kontrola sidadaun hotu tenke uza dokumentu kompletu bainhira viajen no mos labele utiliza arma branka.

Rate this item
(0 votes)

Independente Digital TV