Kuarta, 14 Novembru 2018 | Login
Facebook Facebook

Lohi-malu husi FB, Lakon Tais, Fahi no Osan Featured

DILI: Esperansa husi Aifunan (la’os naran loos) atu hetan osan kreditu buras fila fali bainhira mane ida, bolu de’it Fehuk (la’os naran loos), ne’ebé koñese iha facebook, hatete bele fasilita.

Fofoun tanba sente baruk, Aifunan loke facebook hodi haree ‘atividade’ iha ne’ebá. La finze, Fehuk mosu hodi hase.

Hafoin koalia ba-mai no klaru. Ikus mai Aifunan hahú koalia kona-ba ninia problema kredit osan iha banku ida maibé to’o ohin seidauk sai. Fehuk ne’ebé haree oportunidade ne’e aproveita kedan.

Fehuk hahú ninia jogu hodi lohi Aifunan. Nia husu atu hasoru-malu ho aifunan hodi bele rezolve problema ne’ebé iha.

Tuir akuzasaun husi Ministériu Públiku, iha loron la apuradu iha 2017 iha iha Tasi-tolu arguidu ho lezada hasoru hodi koalia kona-ba muda konta bankaria husi banku privadu ida ba banku nasional.

Molok hasoru-malu, arguidu ho inisial LL no lezada ho inisial CB kontaktu-malu husi facebook.

“Iha altura ne’ebá arguidu husu ba lezada katak “Ó agora dadaun ne’e halo saida?”, lezada hatan ba arguidu katak “ha’u la halo buat ida, agora kredit osan iha banku M** maibé to’o agora osan seidauk sai”. Arguidu hatan ba lezada katak “ha’u servisu iha Banku BN** ha’u bele muda ita-boot nia rekening ba fali banku seluk,” dehan MP iha ninia akuzasaun.

Ho nune’e lezada fiar no arguidu ho lezada hasoru-malu. Lezada entrega ninia dokumentus hanesan sertidaun RDTL, kartaun eleitoral no konta bankaria ba arguidu.

Liu tan lezada dehan, iha momentu ne’ebá arguidu rasik mak fó hatene katak nia servisu iha Banku BN** no nia bele muda konta bankaria ba banku seluk hodi bele kredit osan.

“Iha momentu ami hasoru-malu iha Tasi-Tolu ha’u entrega dukumentus ne’e arguidu dehan ba ha’u katak Ó iha manu ka maibé ha’u dehan ba nia katak ha’u laiha manu maibé ba oleh-oleh seluk ha’u bele fó, buat ita ajuda malu ne’e. Entaun ha’u fó de’it tais metan rua, mane ida ho feto nian ida, no mós osan $15.00,” dehan lezada.

Hafoin, iha 27 Janeiru 2017 lezada simu telefone husi arguidu katak osan kredit nian aban sai ona.

Ho nune’e lezada lori fahi aman ida ho osan $200 tau iha envelope hodi ba fó arguidu hanesan agradesimentu ida tanba osan ne’e sai lalais.

Maibé, liu tiha loron balun, arguidu kontaktu fali ba lezada hodi dehan katak osan seidauk bele sai tanba xefe banku sei ba rai li’ur.

“Depois de ida ne’e arguidu taka mate telefone no mós blok ha’u husi nia kolega iha facebook to’o ami mai Tribunál,” dehan lezada.

Ho arguidu nia hahalok ne’e, MP akuza arguidu ho krime burla agravadu ne’ebé previstu iha artigu 267 kodigu penal ho ameasa pena prizaun tinan 2 to’o tinan 10.

Entretantu, arguidu nega hotu faktus ne’ebé iha.

Tuir arguidu durante ne’e nia laiha account facebook no la uza telemovel android.

“Ha’u durante ne’e business manu oinsa ha’u lohi lezada?,” dehan arguidu ba Tribunál.

Rona ida ne’e Tribunál adia julgamentu ne’e ba fali loron seluk hodi rona deklarasaun husi sasin.

Read 517 times
Rate this item
(0 votes)