Print this page

Edifísiu TMD La Merese Uza Halo Julgamentu Featured

By Martinha Gusmao Agostu 21, 2018 7118
Ministru Justisa, Manuel Cárceres Ministru Justisa, Manuel Cárceres

DILI: Edifísiu Tribunál Munisipál Dili (TMD) la favoravel ona atu halo servisu. Ne’e duni, presiza toma atensaun husi kompetente hodi prepara kondisaun di'ak ba instituisaun ne’e.

Ministru Justisa, Manuel Cárceres, rekoñese Tribunál Dili la merese ona atu halo julgamentu, tanba kondisaun ladún di'ak. Fatin kloot no bainhira iha julgamentu boot laiha espasu atu la'o.

“Kuandu julgamentu boot ita liu husi ne’ebá mós la di'ak hamosu engarrafamentu. Karreta-motór la’o mós la di'ak”, dehan nia, iha servisu fatin, Kaikoli, horisehik.

Ne’e duni, ministru kompromete bainhira situasaun polítika la'o normál ona sei halo konstrusaun ne’ebé sei hanaran Palásiu Justisa.

Tanba ne’e, nia dehan, governu atensaun halo konstrusaun uluk ba Tribunál Munisipál Dili. Ba tinan 2019 Governu haree prevé orsamentu hodi halo konstrusaun ne’e.

Antes ne’e, Prezidente Tribunál Rekursu, Deolindo dos Santos hatete, esforsu ne’ebé sira tenta atu foti maka iha tinan 2015-2016 dezeñu prontu hotu ona maibé iha buat balun mak presiza atu halo tan.

Nia dehan, agora ne’e mak tribunál hanoin atu prevé orsamentu ba konstrusaun 2019 nian atu tau orsamentu ne’ebé boot.

“Ita tenke halo arrendamentu ba espasu fatin ba Tribunál Munisipál Dili nian, tanba ne’e la fasil atu hetan fatin adekuadu”, dehan nia, Deolindo.

Tanba ne’e, Tribunál iha hanoin ida katak bele dudu prosesu ne’e ho lalais ba iha tinan 2019 haree halo nusa para konstrusaun ho lalais.

Iha parte seluk, Prezidente Asosiasaun Majistratura Jurídiku Timor-Leste (AMJTL), Antonino Gonçalves hateten, edifísiu Tribunál Dili ne’e uluk tempu Indonézia nian to’o agora.

Nia dehan, agora daudaun ne’e kondisaun ne’e ladún di'ak, tanba didin sira mós hahú nakfera, kaleen mós ferrujen hotu, inklui sala julgamentu mós la to’o atu hala'o julgamentu tanba sala hamutuk 5 de’it.

Tribunál Dili ne’e iha ona planu atu halo dezde iha tinan 2011 iha Kaikoli, dezeñu hotu, maibé to’o agora seidauk implementa ho razaun katak dezeñu ne’e sala tenke hadi'a.

Tanba ne’e, husu ba Governu foun agora ne’e iha hanoin atu halo konstrusaun, tanba kondisaun tribunál ne’e ema hotu hatene.

Rate this item
(0 votes)