Kuarta, 24 Outubru 2018 | Login
Dezenvolve TL, Presiza Matenek no Badinas

Dezenvolve TL, Presiza Matenek no Badinas Featured

DILI: Atu dezenvolve Timor Leste presiza iha matenek, abilidade, kriatividade no badinas inklui dixiplina.

Tan ne’e, tempu ona joven sira hahú sakrifika aan no badinas hodi kapasita aan atu bele sai lideransa iha futuru hodi lori dezenvolvimentu ba família, sosiedade no nasaun.

Tan ne’e, Fundadór Youth Community More Performance (YCMP)  Maria Jovita Pereira husu juventude sira atu sakrifísiu aan no badinas hodi inkilina aan  iha organizasaun voluntáriu nune’e sira bele deskobre sira nia abilidade no matenek atu bele kontribui ba dezenvolvimentu pesoál, sosiedade no ba nasaun Timor-Leste.

Nia hato'o kestaun ne’e, bainhira sai oradór ba formasaun lideransa ba juventude sira ne’ebé realiza husi Rotary Youth Leadership Awards- Timor Leste (RYLA-TL) ba loron daneen ho nia tópiku “servisu no sakrifísiu”

Nia dehan, xave ba hetan susesu mak iha konxiénsia morál no espirituál hodi haforsa kometimentu tanba joven mak nu’udar  jerasaun foun ba Timór nia futuru.

Ba joven sira, nia husu presiza deskobre sira  nia abilidade, kriatividade  no rekoñese nia aan nu’udar jerasaun foun Timór nia atu kontribui ba dezenvolvimentu nasaun nia iha futuru.

Atu sai lider di'ak, nia husu presiza maneja tempu ho di’ak no hodi liberta povu husi kiak no mukit.

Hahú agora, joven sira tenke organiza malu hodi buka matenek atu kaer fali ukun iha futuru. Tanba dezafiu iha moris mak oportunidade atu luta ba moris di’ak.

 “Juventude sira tenke iha espíritu vontade atu ajuda maluk sira ne’ebé maka hamlaha ba ema nia tulun,”  dehan nia iha Maloa-Dili, horisehik.

Oradór ne’e agradese ba Rotary Youth Leadership Awards- Timor Leste (RYLA-TL) fó ona oportunidade  ba juventude atu aprende kle'an kona ba lideransa nian no  espera katak juventude sira bele sai lider ne’ebé maka di’ak iha futuru.

Iha fatin hanesan, Formadu Donatos Da Conceição Martins sente kontente tebes ho formasaun lideransa ne’ebé maka oferese husi  Rotary Youth Leadership Awards (RYLA).

 Nia dehan, Formasaun ne’ebé maka oferese husi RYLA bele ajuda juventude sira nia koñesimentu nune’e  juventude sira  bele sai hanesan lideransa ne’ebé  maka di’ak iha futuru.

Nia hatutan, husi formasaun ne’e mós bele kapasita juventude sira nia mentalidade atu prepara aan sai lideransa timor nian.

Hanesan Juventude, nia dehan hakarak tebes atu implementa espíritu voluntarizmu hodi apoiu komunidade sira.

Entretantu, Formadu Sejulino Amarál apresia tebes ba  Rotary Youth Leadership Awards (RYLA) ne’ebé maka iha  inisiativa atu hakle'an joventude sira nia koñesimentu kona ba lideransa nian.

Formada Zélia Fátima Da Costa kontente bainhira hetan oportunidade hodi aprende kona ba lideransa nian. Tanba durante ne’e juventude sira barak  hamlaha hela ba formasaun lideransa nian.

Nia dehan, ho formasaun lideransa ne’ebá maka oferese husi RYLA   bele sai hanesan bukae no motiva juventude sai hanesan lideránsa ne’ebé maka di’ak ba família, sosiedade no ba nasaun Timor-Leste.

Tuir oráriu, Ohin (15/09),  Rotary Youth Leadership Awards Timor-Leste (RYLA-TL)  hamutuk ho Embaixada Nova Zelandia, Rotary Club Of Dili, Rotary Club Of Dili Lafaek no reprezentante Woodside Sunrise And Venture  sei fahe sertifika ba juventude 86 ne’ebé tuir ona formasaun durante semana ida.

Read 599 times
Rate this item
(0 votes)