Kinta, 16 Agostu 2018 | Login
Piala dunia 2018 Piala dunia 2018

Kapasidade ETO La Perkore Timor Laran Tomak iha Kopa Mundial Featured

DILI: Kopa Mundiál ne’ebé sei hahú iha loron 14 Juñu to’o 15 Jullu, Timor-Leste, sei hetan tranzmisaun husi ETO Telco, maibé komunidade balun labele asesu tanba seidauk iha kapasidade atu perkore ba territóriu Timor tomak.

Diretór Téknika TV, Produsaun no Marketing ETO Telco, Edmundu Freitas Lopes hateten, Kopa Mundiál tinan ne’e sira maka manan konkursu hodi halo tranzmisaun, maibé kapasidade seidauk to’o atu perkore to’o postu administrativu sira.

“Kapasidade tranzmisaun to’o de'it iha munisípiu sira”, dehan nia, iha knaar fatin, Fatuhada, horisehik.

Nia dehan, tranzmisaun ba munisípiu hotu inklui Rejiaun Autónomu Oekusi sei asesu ho gratuita, signifika uza antena baibain de’it no sira halo auto scan hodi bele asesu.

Oras ne’e daudaun halo ona instalasaun iha munisípiu hotu. Nune’e, munisípiu haat maka sei iha prosesu instalasaun hanesan Ainaru, Manufahi, Vikeke no Lautem.

Ba munisípiu sira seluk atinji ona 70% tanba halo ona instalasaun. Ba postu balun labele kobre tanba limitasaun.

Ba postu sira ne’ebé la hetan tanba haree ba jeografia Timor nian, ne’ebé foho barak, tanba ETO+ mais foin halo investimentu, nune’e to’o de’it iha munisípiu sira, ne’ebé servisu hamutuk ho operadór Telecomsel.

Iha fatin hanesan estudante UNTL, Luis de Almeida Ximenes, preokupa uitoan ho Kopa Mundiál tinan ne’e, tanba rede tranzmisaun ETO Telco nian labele perkore territóriu hotu.

Nia sujere karik hakarak manan liña ba tranzmisaun kopa mundiál ne’e labele halo diskriminasaun ba komunidade sira, tanba ema hotu hotu hakarak asesu.

Dili sei La Asesu Kopa Mundiál ho Antena Baibain

Kopa Mundiál tinan ne’e komunidade Dili laran sei la asesu ho antena baibain, tanba ETO Telco rasik sei la fó rede ba iha Dili, ho razaun sira mak manan husi FIFA.

Diretór Edmundu Freitas Lopes hateten, razaun prinsipál sira lakohi halo kooperasaun ho televizaun sira iha Dili laran tanba sira mak manan, nune’e direitu tomak iha sira mak deside.

Razaun fundamentál lakohi halo kooperasaun televizaun sira tanba manan no direitu atu eskolla, tanba ne’e sai hanesan baze ekonomia ba asinatura nune’e mós asegura ida ne’e.

Ba komunidade iha Dili laran sei la asesu kopa mundiál ho antena baibain, presiza sosa receiver tanba ETO Telco hodi bele garantia kualidade.

Nia dehan, oras daudaun ETO Telco foin halo investimentu ne’e la’o ho tempu, tanba Kopa Euro 2020 manan nafatin hodi kobre ba Timor-Leste tomak, nune’e ba oin nafatin halo investimentu maka’as liu iha área televizaun.

Iha fatin hanesan estudante UNTL, Rogaia Boromeo, sente triste tebes ho Kopa Mundiál tinan ne’e, tanba komunidade Dili sira ne’ebé uza antena baibain labele asesu hanesan tinan haat liu ba tranzmite husi RTTL-Ep, ne’ebé fó biban ba ema hotu bele asesu ho livre.  

Read 524 times
Rate this item
(0 votes)