Julie Bishop Dehan TL Parseiru Prinsipal Australia Featured

By Jullu 30, 2018 7054
Ministra Negósiu Estranjeiru HON. Julie Bishop MP hetan tara tais Timor bainhira tuun husi aviaun Air North Australia, domingo (29/7). Foto: MNEC Ministra Negósiu Estranjeiru HON. Julie Bishop MP hetan tara tais Timor bainhira tuun husi aviaun Air North Australia, domingo (29/7). Foto: MNEC

DILI: Ministra Negósiu Estranjeiru HON. Julie Bishop MP hatete, Timor-Leste hanesan parseiru prinsipal Australia tanba nuudar nasaun viziñu rejional iha Sudeste Aziatiku no atu hametin liutan kooperasaun entre Australia ho Timor-Leste.

Julie too iha Aeroportu Internasional Presidente Nikolau Lobatu Dili, (29/7), domingo lorokraik tuku 17:20 oras Timor-Leste, ho aviaun Air North Australia.

Objetivu husi vizita ne’e, oinsa atu hametin kooperasaun entre nasaun rua ne’e iha área seguransa, dezenvolvimentu no ekonómia nian iha kapítulu foun ba relasaun Austrália no Timor-Leste nian, hafoin asina tratado ne’ebé estabelese ona ba ami-nia fronteira marítima permanente.

Tuir orariu, segunda ohin (30/7), Julie Bishop sei halo nia primeira vizita ba Ministériu Negósiu Estranjeiru Timor-Leste, hafoin remata kontinua hasoru malu ho Presidente Repúblika Fransisco Guterres Lu Ólo, no kontinua fali hasoru malu ho Primeiru Ministru Taur Matan Ruak.

Liu husi komunikadu husi Embaxada Australia iha Dili, katak hafoin remata nia vizita iha Timor-Leste, Julie Bishop sei halo ba Malázia, Singapura no Indonézia.

Primeira vizita nia hahaú husi Timor-Leste, iha loron 29 fulan Jullu to’o loron 7 fulan Agustu, hodi afirma fila fali kompromisu Austrália nian kontinua sai parseiru prinsipál ba viziñu rejionál sira iha Sudeste Aziátiku.

“Iha Dili, ha’u sei hasoru lideransa sira hosi Governu foun Timor-Leste nian. Ami sei ko’alia kona-ba oinsa atu hametin ami-nia kooperasaun iha área seguransa, dezenvolvimentu no ekonómia nian iha kapítulu foun ba relasaun Austrália no Timor-Leste nian, hafoin asina tratado ne’ebé estabelese ona ba ami-nia fronteira marítima permanente,"dehan Julie.


Rate this item
(0 votes)

Independente Digital TV