Print this page

Ema 900 sei Partisipa iha Jogu CPLP 2020 Featured

By Pedro Alves Martins Jullu 12, 2019 6824
SEJD Nelio SEJD Nelio

DILI: Iha fulan Jullu tinan 2020, Timor Leste sei sai uma-nain ba jogu CPLP. Tuir kalkulasaun, ema besik rihun 900 mak sei partisipa iha eventu boot ne’e.

Tuir planu jogu CPLP ba dala 12 ne’e sei realiza iha loron 10 nia laran, hahú husi loron 14 to’o 24 Jullu 2020. Iha modalidade 8 mak sei kompete mak modalidade Futebool, Basketebool, Xadres, Kungfu, Karate, Taekwondo, Atletizmu, no Tenis Kampu.

Sekretariu Estadu Juventude no Desportu Nelio Isaac Sarmento iha konfiansa katak otel hirak ne’ebé iha daudauk ne’e iha bele akumula númeru atleta no delegasaun husi nasaun CPLP.

“Jogu CPLP sei reprezenta husi nasaun membru sira, kada nasaun ema na’in 92 kompostu husi ofisiais, altelata no treinadór. Se sira partisipa hotu sei bele simu ema to’o 800. Se aumenta tan ema ne’ebé akompaña ministru 50 bele to’o 900,” dehan nia.

Atu halo preparasaun, iha Kuarta (10/07), Nelio hamutuk ho Ministra Edukasaun, Juventude no Desportu Dulce de Jesus, halo aprezentasaun ba Konsellu Ministru.

“Aprezenta ba Konsellu Ministru kona-ba kondisaun infra-estrutura atu simu ema hirak ne’e, tanba iha otél barak ne’ebé iha kondisaun atu simu,” dehan Nelio iha Palasiu Governu, Kuarta (10/07).

Ba infra-estrutura desportu nian, Nelio dehan, iha fulan oin sei hahú halo reabilitasaun ba Jinaziu GMT no hala konstrusaun foun ba kampu iha tasi-ibun Largo Lecidere.

“Espera katak to’o fulan Dezembru tinan ne’e konklui reabilitasaun no konstrusaun ne’e.”

Ba estadiu Munisipal Dili, Nelio dehan, estadiu ne’e sei uza ba serimonia abertura no enseramentu. Enkuantu ba jogu kualifikasaun sei realiza iha estadiu Gleno, Munisipiu Ermera.

“Semi finál no finál iha Dili,” deha nia.

Kona-ba kondisaun estadiu Dili, Sekretariu Estadu ne’e hatete, nia parte sei halo enkontru ho Konsellu Administrasaun Fundu Infra-estrutura (KAFI) atu bele halo investigasaun no konklui iha fulan ne’e nia laran nune’e governu bele foti desizaun ba prosesu reabilitasaun estadiu munisipal Dili.

“Ida ne’e primeiravez ba Timor Leste atu organiza jogu, karik ita susesu katak (jogu) Asean mós ita bele organiza karik,” dehan nia.

Iha fatin hanesan, Ministru Estadu no Prezidensia Konsellu Ministru Hermenegildo Augusto Pereira Cabral hatete, Konsellu Ministru halo aprovasaun ba lei ministeriál hodi tau-matan ba prosesu tomak.

Nia dehan, Konsellu Ministru apoiu no ministériu barak sei hola parte iha komisaun ba preparasaun Jogu CPLP atu bele realiza ho susesu.

Rate this item
(0 votes)