Kuarta, 22 Novembru 2017 | Login
Alkatiri Alkatiri

Alkatiri: Publikasaun Média Austrália Falsu Featured

DILI: Xefe Negosiadór Fronteira Marítimu (FM), Kay Rala Xanana Gusmão ho nia ekipa, halo ona negosiasaun kona-ba opsaun atu dada pipeline Greater Sunrise (GS).

Maski nune’e, média Austrália publika katak, Primeiru Ministru, Mari Alkatiri, deklara ona atu dada pipeline GS ba Darwin Austrália.

Deklarasaun Xefe Governu nian hamosu reasaun makaas deputadu opozisaun sira iha Parlamentu Nasionál.

Bankada CNRT firme nafatin katak pipeline tenke dada mai Timor. Ida ne’e maka opsaun ne’ebé Xanana Gusmão hakarak dezde uluk kedas.

Prezidente Bankada CNRT, Arão Noé de Jesus hateten, lamenta kuandu lee média husi Austrália nian katak Primeiru Ministru, Mari Alkatiri, konkorda atu dada hodi ba Austrália.

“Sé ida ne’e maka loos duni, lamentavél tebetebes”, tenik nia, iha Uma Fukun PN, horisehik.

Tuir nia, Timor-Leste luta hela oinsá atu dada kadoras mai Timor, tanba ho objetivu ida ne’ebé bele loke kampu servisu barak liu husi konstrusaun refinaria iha Same-Betanu, LNG iha Beasu no Suai Supply Base.

Karik informasaun ne’e la loos, hein katak jornál ne’ebé públika tenke klarifika fila-fali. Tanba ne’e afeta tebes ba Estadu ninia interese.

Iha fatin hanesan, Prezidente Bankada Partidu Libertasaun Populár (PLP), Fidelis Magalhães, husu ba Governu atu esklarese didi’ak. Karik informasaun ne’e loos signifika iha polítika foun ida.

“Polítika antes to’o agora ami nia polítika ne’e katak, (pipeline) Greater Sunrise tenke dada mai Timor”, teni nia.

PLP lakohi halo espekulasaun iha faze polémika, tanba ne’e hakarak atu rona husi Governu kona-ba polítika dada kadoras Greater Sunrise nian.

Publikasaun Média Austrália Falsu

Hataan ba kestaun ne’e, Primeiru Ministru, Mari Alkatiri, informasaun ne'ebé publika husi The Australian Business Review ho títulu ‘sunrise hopes rise as talks begin’ ne’e la loos.

Saida mak Xefe Governu fó sai iha Perth-Austrália maka sujere diverjénsia entre governu ho ekipa negosiasaun ba fronteira marítima lidera husi Xefe Negosiadór Kay Rala Xanana Gusmão atu prosesa gás husi Greater Sunrise.

“Reportajen ne’e laiha fundamentu no publika la loos”, dehan Alkatiri, liu-husi komunikadu ne’ebé diáriu ne’e asesu.

The Australian Business Review, publikadu iha loron (6/11) ho títulu lian inglesh ‘Sunrise hopesrise as talks beging,’ husi Jornalista Paulo Garvey, atribui deklarasaun ida ba PM Mari Alkatiri hodi hatete “Mari sujere katak, Timor-Leste preparadu atu tetu sé gás husi Greater Sunrise bele ba prosesa iha Austrália hodi nune’e bele ultrapasa impase”.

Maski nune’e, Xefe Governu rejeita totál informasaun ne’e, tanba artigu ne’ebé hakerek iha média ne’e dook husi kontestu ne’ebé PM Alkatiri hateten.

Tanba ne’e, VII Governu Konstitusionál sempre reafirma ninia pozisaun kona-ba kestaun fronteira marítima hodi fó apoia tomak ba Xefe Negosiadór Kay Rala Xanana Gusmão.

“Iha ha'u nia diskursu iha PM Austrália Malcolm Turnbull nia oin rasik ha'u hatete Timor-Leste tomak husi Gabinete Prezidente Repúblika to’o aldeia ki’ik liu iha foho hamutuk ho objetivu ida de'it apoia inkondisionalmente esforsu Xefe Negosiadór Kay Rala Xanana Gusmão nian”, tenik PM Alkatiri.

Ne’e duni, Xefe Governu ne’e mós mantein firme no pozisaun katak kadoras ne’e tenke dada mai Timor-Leste.

Entretantu, Sekretáriu Estadu Konsellu Ministru no Komunikasaun Sosiál, Matias Boavida Freitas, liu husi konferénsia imprensa hateten, Governu sei halo aprosimasaun ho Konsellu Imprensa TL hodi kontaktu ho Konsellu Imprensa Austrália nian hodi solusiona diversialidade ne’ebé jornál The Australian Business Review halo ba Timor Leste.

Nia dehan, Konsellu Imprensa Timor-Leste kontaktu ho Konsellu Imprensa Austrália nian, hodi husu medida saida mak toma ba média Austrália nian ne’e, maibé Governu husik hela ba KI hodi foti desizaun aktu sira ne’e.

Ne’e duni, Governu hakarak husu ba hodi kontaktu direta ho Austrália hodi foti asaun ruma hodi halo korresaun ba notísia sira ne’e. 

Read 1640 times
Rate this item
(0 votes)
  • MidAd1
  • Heineken Klaran
AdBottom1