Semana Oin, TL- Austrália Kontinua Diskute Fronteira Marítima Featured

By Humberto dos Santos Agostu 25, 2017 3064
Mina Timor Mina Timor

DILI: Prosesu diskusaun ba markasaun Fronteira Marítima ne'ebé lidera husi Xefe Negosiadór Prinsipál, Kay Rala Xanana Gusmão, sei hahú fali iha Segunda (28/8), semana oin.

Tanba prosesu fronteira marítima ne’e la’o hela iha reuniaun ámbitu Komisaun Konsiliasaun iha semana oin.

“Ita hein sei hahú iha dia 28 prosesu negosiasaun ne’e la’o… Estadu fó apoiu tomak ba Xefe Negosiadór atu lori prosesu ne’e ba to’o rohan”, dehan Primeiru Ministru, Rui Maria de Araújo, iha Palasiu Prezidensiál, Ai-Tarak Laran, horisehik.

Ne’e duni, hein katak semana oin delegasaun rua husi Timor-Leste no Austrália sei halo reuniaun entrada ho Komisaun Konsiliasaun atu haree kona-ba pozisaun ne'ebé parte ida-idak defende.

Nune’e, buka solusaun ne'ebé justu no solusaun baze direitu internasionál ne’ebé durante ne’e Timor-Leste enfrenta pozisaun ne’e.

Oras ne’e, Rui dehan, Xefe Negosiadór arranka ona iha ne'ebá hodi ba prepara tékniku ho ekipa téknika.

Tanba ne’e, VI Governu Konstitusionál fó apoiu tomak Xefe Negosiadór Prinsipál Fronteira Marítima, Xanana Gusmão no fiar metin lori prosesu ne’e hetan rezultadu pozitivu.

Iha tempu la hanesan, Prezidente Parlamentu Nasionál, Adérito Hugo da Costa hateten, prosesu negosiasaun fronteira marítima sei hetan solusaun di'ak. Tanba, negosiadór sira la'ós atu ba hakraik aan ba ema, maibé husu direitu soberania tuir lei internasionál.

 

Rate this item
(0 votes)

Independente Digital TV