Kuarta, 22 Novembru 2017 | Login
Ilustrasaun  Justisa Ilustrasaun Justisa

Na’i Ulun Vs Autor Judisiariu

Kazu korrupsaun ne’ebé envolve eis Ministra Finansas, Emília Pires no eis Vise-Ministra Saúde, Madalena Hanjam hamosu tensaun polítiku. Karta aberta husi Emília ba órgaun soberanu sira no karta aberta husi Ministru Kay Rala Xanana Gusmão identifika indisius no eskándalu foun.

Tuir Konstituisaun Repúblika Demokrátika Timor-Leste artigu 16 hateten, sidadaun hotu-hotu hanesan iha lei nia oin, no mós iha direitu no obrigasaun hanesan.

Maski nune’e, to’o akordaun tribunál primeira instánsia nian tun, arguida Emília Pires haruka karta aberta ba órgaun soberanu sira kona-ba ninia pozisaun no razaun la simu desizaun tribunál nian.

Desizaun primeira instánsia la’ós dalan ikus liu, maibé sei iha dalan seluk atu bele halo rekursu. Infelizmente, antes desizaun ne’e sai Emília Pires halo ona auto-defeza ho maneira sees-aan ba li’ur no halo ‘atake’.

La’ós ne’e, eis-Primeiru Ministru, Kay Rala Xanana Gusmão mós halo karta aberta ida ba ninia kolega Emília Pires. Iha karta ne’e atuál ministru ne’e kestiona mós hanesan saida mak Emília subliña ona antes.

Tuir lei, ema na’in rua ne’e (Emília Pires no Xanana Gusmão) halo ona koasaun ba majistratura no obstrusaun ba atividade jurisdisionál ne’ebé prevé iha Kódigu Penál artigu 283 no 284.

Estrañu liu mak ninia karta aberta , Xanana Gusmão relata indisius no eskándalu balun ne’ebé envolve husi autór judisiáriu sira hanesan Prezidente Tribunál Rekursu (PTR) no Prokuradór Jerál Repúblika (PJR).

Karik akuzasaun husi Xanana nian loos duni? Timor-Leste iha problema boot. Povu sei lakon konfiansa ba ita ninia setór judisiáriu sira, tanba sira rasik mós envolvidu iha kazu balun maibé laiha investigasaun no justisa ruma hasoru sira tanba sira mak hanesan na’in ba penál no desizaun.

Kuandu situasaun ne’e la hadi’a sei fó implikasaun boot ba publiku. Ema barak sei lakon konfiansa ba setór judisiáriu sira, tanba ninia ulun boot sira envolve mós iha eskándalu balun.

Ne’e duni, atu hamoos pensamentu aat públiku nian kona-ba eskándalu iha setór judisiáriu iha buat haat ne’ebé Komisaun Anti Korrupsaun (KAK), Ministériu Públiku (MP) no Tribunál tenke halo mak hanesan: Primeiru (1), julgamentu ba Emília Pires tenke la'o nafatin. Segundu (2), halo investigasaun ba Xanana Gusmão no Emília Pires kona-ba kazu koasaun ba majistratura no obstrusaun ba atividade jurisdisionál. Terseiru (3), investiga Prezidente Tribunál Rekursu (PTR) no Prokuradór Jerál Repúblika (PJR) relasiona ho akuzasaun Xanana Gusmão nian. Kuartu (3), kuandu laiha evidénsia ruma kona-ba akuzasaun ne’e Xanana Gusmão tenke hataan ba denunsia Kalunioza. Ita Hein… 

Read 374 times
Rate this item
(0 votes)
  • MidAd1
  • Heineken Klaran
AdBottom1