Xanana Simu Desizaun PR Lú Olo ho Insultu Featured

By Cristina Ximenes Janeiru 29, 2019 8462
Prezidente bloku koligasaun Aliansa Mudansa ba Progresu (AMP), Kay Rala Xanana Gusmão Prezidente bloku koligasaun Aliansa Mudansa ba Progresu (AMP), Kay Rala Xanana Gusmão

DILI: Prezidente bloku koligasaun Aliansa Mudansa ba Progresu (AMP), Kay Rala Xanana Gusmão, hatudu emosaun ba Prezidente Repúblika, Francisco Guterres Lú Olo no responde kedas ho liafuan insultu ba Xefe Estadu.

“Prezidente Repúblika veta tiha ona Orsamentu Jerál Estadu (OJE) 2019 ne’e (...) Ha’u lee tiha nia justifikasaun buat sira ne’e hotu la presiza”, dehan Xanana, iha Aeroportu Internasionál Nicolau Lobato Komoro, Sábadu (26/1).

Nia konsidera atu Xefe Estadu veta OJE 2019 la lójika ka la tuir rasionalidade nu’udar Prezidente Repúblika hodi tau interese Estadu ba povu no nasaun nia vida, maibé ezije maka diálogu ho lider sira.

“Tuir nia, justifikasaun ne’ebé Prezidente Repúblika foti laiha lojika”, tenik nia.

Reasaun Xanana nian nakonu ho emosaun, tanba hafoin sa’e karreta eis-Prezidente Repúblika ne’e hatun tan vidru hodi repete tan ninia liafuan desizaun ne’e la lojika ho insultu.

Reasaun Xanana ne’e la’ós foin primeira-vés, ba dahuluk bainhira sei Xefia IV Governu Konstitusionál, hatete mós liafuan insulta ba eis-Vise Primeiru Ministru, Mário Viegas Carrascalão.

Tanba la simu ho insultu ne’ebé Xanana hasai, Mário Carrascalão deside hodi rezigna-aan husi kargu nu’udar Vise Primeiru Ministru Asuntu Administrasaun no Boa Governasaun.

Mai ho Matéria Foun sei Presiza Estuda

Entretantu, Prezidente Repúblika (PR) Francisco Guterres Lú Olo hateten, OJE 2019 ne’ebé veta ona ne’e Parlamentu Nasionál lori fali mai ho matéria foun nune’e presiza loron 30 atu estuda.

“Ha’u hanoin deputadu sira iha ne'ebá hatene di’ak liu lei artigu 95 númeru 1 horibainhira aplika ba lei atividade petrolíferu, ida ne’e sira invoka artigu 88 númeru 2 atu bele Prezidente Repúblika promulga, kumpre tiha”, dehan PR Lú Olo hafoin kampaña kuda ai-horis iha área Tasi Tolu, Sesta (25/01).

Nia esplika, agora artigu númeru 95 númeru 2 no 3 rejime orsamentu no rejime fiskál ninian, ida ne’e bainhira veta presiza 2/3 deputadu prezente iha Parlamentu Nasionál atu ratifika no konfirma haruka fila-fali ba Prezidente Repúblika hodi promulga ho baze jurídika artigu 88 númeru 3.

Maibé, bainhira OJE mai ho matéria foun ne’e la'ós ona matéria uluk nian, sei prosesu nafatin ho prosesu ne’ebé tuir artigu 88 númeru 1 Prezidente Repúblika iha loron 30 estuda no analiza antes foti desizaun veta ka promulga.

Prezidente Repúblika husu orsamentu ne’ebé aloka ona tenke ezekuta ba nia programa katak osan tenke hamutuk ho nia programa kedas no tenke halo fiskalizasaun di’ak ba ezekusaun orsamentu ne’e.

Nune’e mós iha PN, lider bankada sira parlamentár deside ona atu halo reapresiasaun ho opsaun konfirmasaun votu ka alterasaun ba OJE 2019 ne’ebé tuir planu sei realiza iha Kinta (31/1), semana ne’e.

Prezidente Repúblika veta dekretu PN númeru 4/V OJE 2019 tanba konsidera hamenus liután sustentabilidade no la hatuir konstituisaun no lei estruturante sira ne’ebé dezekilibriu orsamentál aas tebe-tebes no laiha polítika alternativa.

Rate this item
(1 Vote)

Independente Digital TV