Sexta, 20 Outubru 2017 | Login
Branco Branco

VIII Governu sei La Entrega Gratuita Featured

DILI: Bloku Koligasaun (BK) ne'ebé harii husi partidu FRETILIN no Partidu Demokrátiku (PD) forma ona VII Governu Konstitusionál. Ne’e duni, bainhira governu ne’e monu tanba fallansu ruma VIII Governu sei la entrega gratuita, maibé sei liu husi prosesu eleisaun antesipada mak foin forma.

Prezidente Bankada FRETILIN, Francisco Miranda Branco hateten, kuandu Presidente Repúblika indijita Primeiru Ministru no konvida partidu maioria segundu no sira seluk, momentu ne’e partidu ida mós la halo kontestasaun tanba ne’e governu la’o.

“Maibé (agora) mosu fali ona bloku Koligasaun Opozisaun Parlamentár (KOP) mak kuandu governu ne’e monu, ita hakat ba eleisaun antesipada”, dehan nia, iha Uma Fukun PN, horisehik.

Nia hatutan, partidu opozisaun sira hakarak atu hamosu governu alternativa ne’e loloos mosu iha inisisiu kedas Presidente Repúblika seidauk indijita Primeiru Ministru.

Maibé, foin mak hamosu, kuandu Governu ne’e falla mak hakarak ka lakohi sei ba halo eleisaun antesipada, la'ós atu fó oportunidade ba Bloku Koligasaun atu hakat ba ukun.

Nia hatutan, polítika mak la’o nune’e, maibé iha aprezentasaun programa mak sei determina. Tanba ne’e, deputadu ida-idak husi bankada sei hetan kopia atu sira bele lee no diskute iha kada komisaun depois mak haree fali prosesu ne’e.

Nia hatutan, atu garante ukun ne’e deputadu hotu tenke iha sentidu Estadu, povu mak iha soberania. Tanba ne’e, fó ona fiar ba lider sira hanesan deputadu atu asegura povu nia desizaun ne'ebé deside ona iha eleisaun parlamentár.

Ne’e duni, hanesan polítiku na’in iha responsabilidade tomak ne'ebé povu atribui ona, maibé situasaun nune’e nafatin kuandu governu ne’e falla partidu FRETILIN rasik prontu atu hakat ba eleisaun antesipada.

Iha fatin hanesan, Deputadu Bankada PD, Manuel Carvalho hatete, konstituisaun RDTL garante liberdade ba ema hotu atu bele halo sira nia espresaun, maibé tenke tuir konstituisaun haruka.

Tanba ne’e, karta ne'ebé bloku opozisaun aprezenta ba Presidente Repúblika hodi prepara governu alternativa ne’e la devia mosu iha tempu ne’e. Maski karta mosaun iha ona, maibé Xefe Estadu sei la halo desizaun tuir grupu ka partidu ida nia hakarak, mata-dalan mak konstituisaun.

Nia husu ba jerasaun tuan sira atu husi hela impresaun di'ak ida ba jerasaun foun sira atu banati tuir, atu iha futuru bele ukun tuir Konstituisaun.

Nune’e, Prezidente Bankada Partidu Libertasaun Populár (PLP) Fidelis Magalhães hatete, aprezenta karta ba iha Presidente Repúblika ne’e antes ka depois laiha problema, tanba regra konstitusionál.

Nia hatutan, bloku opozisaun harii la'ós atu sai fali AMP atu hamonu governu hodi ba ukun, maibé hanesan opozisaun bele hamosu programa no governu alternativa hodi halo kontrolu ba governu ne’e.

Read 1560 times
Rate this item
(0 votes)
  • MidAd1
  • Heineken Klaran
AdBottom1