Tersa, 18 Dezembru 2018 | Login
Xefe Governu Taur Matan Ruak Xefe Governu Taur Matan Ruak

Sosa Asaun ConocoPhillips no Shell, PM Taur: Ita Tenke Brani Enfrenta Risku Featured

DILI: Primeiru Ministru, Taur Matan Ruak hateten, desizaun hodi sosa asaun partisipasaun ConocoPhillips no Shell nian iha kampu petrolíferu Greater Sunrise la fasil.

Prosesu hotu-hotu iha risku, hanesan mós uluk luta ba ukun-aan mós iha risku, lakon ema no sasán maibé ikus mai Timor-Leste ukun-aan, no ema ne’ebé manán, so ema sira ne’ebé brani enfrenta risku.

Nia esplika, hakarak rikusoin ne’e favorese mai timoroan. Agora iha momentu ida atu favorese ba timoroan mak kaer labele husik liu. Buat hotu-hotu sempre iha risku.

“Laiha prosesu ida ke laiha risku. Ema hotu-hotu ne’ebé manán so sira ne’ebé brani enfrenta risku mak manán, ida ta’uk risku nunka manán”, dehan PM Taur hafoin enkontru ho Xefe Estadu, iha Palásiu Prezidensiál, Bairru-Pité, horisehik.

Relasiona ho ezijénsia sosiedade sivíl atu veta alterasaun Lei Petrolíferu, Eis-Prezidente Repúblika ne’e hateten, iha país demokrátiku ema hotu-hotu iha direitu hato’o opiniaun, maibé desizaun finál atu veta ka promulga iha Xefe Estadu nia liman.

Orsamentu Sosa Asaun Shell sei Diskute

Fonte orsamentu atu sosa asaun Shell 26,56% ho presu tokon $300 seidauk klaru. Tanba ne’e, Parlamentu Nasionál (PN) maka sei halo diskusaun hodi haree.

PM Taur dehan, planu atu sosa asaun Shell tarde ona, tanba Orsamentu Jerál Estadu (OJE) 2019 nian haruka liu ona ba PN, maibé sira mós sei halo diskusaun iha ne’ebá.

“Orsamentu ba Kompañia Shell nian ne’e iha OJE 2019 ka oinsá ne’e ha’u hanoin iha Parlamentu Nasionál maka diskute”, dehan Xefe Governu.

Nia hatutan, durante diskute maka haree katak iha nesesidade entaun hatama, maibé karik laiha maka la selu ba asaun Shell.

 

Read 605 times
Rate this item
(0 votes)