Print this page

PN Notifika ona Governu Ba Debate Mosaun Sensura Featured

By : Jacinto Xavier Janeiru 12, 2018 1007
Parlamentu Nasional Parlamentu Nasional

DILI: Hafoin bloku opozisaun Aliansa Maioria Parlamentár (AMP) hatama rekerimentu hodi husu ajenda Mosaun Sensura, Prezidente Parlamentu Nasionál notifika ona governu ho prazu loron 30 maibé seidauk responde.

“Iha loron 18 Dezembru (2017) ha'u anunsia ona no notifika ona governu atu mai hataan iha PN ho prazu loron 30 uteis sura husi loron ne'ebé ha'u anunsia”, dehan Presidente PN, Aniceto Longuinhos Guterres, iha Uma Fukun PN, horisehik.

Meza PN notifika ona Governu, tanba ne’e tuir loloos iha loron 18 Janeiru 2018 mai responde rekerimentu mosaun sensura ne'ebé AMP hatama ona iha Meza PN.

Atu insiste nafatin prosesu ne’e, iha loron 3 Janeiru (2018), Prezidente PN mós kontinua halo karta pedidu ba Primeiru Ministru atu kumpre loron 30 uteis ne'ebé notifika ona ne’e.

Maski nune’e, karta pedidu ne'ebé órgaun lejizlativa hato’o ba órgaun ezekutivu ne’e to’o agora seidauk iha resposta pozitivu, maski hela de'it loron sia atu kompleta loron 30.

Aniceto hatutan, mosaun sensura ne’e hasoru governu. Tanba ne’e, PN tenke rona mós governu atu marka data ruma ne'ebé sira disponivel hodi mai iha hataan.

Iha fatin hanesan, Prezidente Bankada Partidu Libertasaun Populár (PLP), Fidélis Magalhães, hatete to’o agora parte husi meza PN seidauk fó informasaun atu ajenda rekerimentu mosaun sensura nian ne'ebé hatama ona.

“Ami seidauk rona informasaun tanba to’o agora seidauk iha konferénsia lider bankada”, dehan nia.

Tuir loloos governu ne’e tenke mai aprezenta programa ba daruak nian, maibé to’o agora seidauk. Ne’e hanesan halai ona husi responsabilidade, tanba ne’e mosaun sensura sei kontinua avansa hodi ezije ba governu atu asume responsabilidade.

Karik governu ne’e laiha ona vontade atu funsiona Estadu ne’e, Prezidente Bankada CNRT, Arão Noe de Jesus, hatete parte husi AMP prontu ona atu solusiona inserteza polítika ne’e.

“Estrutura sombra VIII Governu hotu-hotu prontu ona, hahú husi programa, orsamentu no lei orgánika, iha hotu ona. Hein desizaun Prezidente Repúblika”, dehan nia.

Karik Xefe Estadu halo desizaun hodi fó konfiansa ba AMP prontu kualkér tempu asume responsabilidade hodi solusiona inserteza polítika ne’e.

Rate this item
(0 votes)

Related items